لنڊن – 18 آگسٽ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار لنڊن ۾ پاڪستان هاءِ ڪميشن ۾ ”زميني رڪارڊ سروسز جي فراهمي“ ۽ ”ون ونڊو پاسپورٽ پروسيسنگ سسٽم“ جي ٻن اهم خدمتن جي مرڪزن جو افتتاح ڪيو. پرڏيهي آفيس پاران جاري بيان موجب اهو قدم وزيراعظم محمد شهباز شريف جي اپريل 2025ع ۾ اوورسيز پاڪستاني ڪنوينشن ۾ ڪيل واعدي جي تڪميل آهي جيڪو ٻاهرئين ملڪ رهندڙ پاڪستانين جي لاءِ موثر، شفاف ۽ پهچ جوڳي حڪومتي خدمتن طرف هڪ اهم قدم آهي. زميني رڪارڊ سروسز، پنجاب لينڊ روينيو اٿارٽي (پي ايل آر اي) ۽ پرڏيهي وزارت جي گڏيل تعاون سان تيار ڪيو ويو آهي جنهن ۾ برطانيا ۾ رهندڙ پاڪستانين کي پاڪستان اچڻ کانسواءِ پنجاب ۾ پنهنجي ملڪيت جي رڪارڊ تائين پهچ ۽ ان جي انتظام جي سهولت ملندي. اهو ڊيجيٽل پليٽ فارم آن لائين وڪري جي معاهدي، شخص (رڪارڊ آف رائيٽس)، اي – گردواري، وراثتي منتقلي ۽ دستاويزن جي تصديق جهڙيون خدمتون پيش ڪري ٿو جيڪو بلاڪ چين ٽيڪنالاجي جي ذريعي محفوظ آهي ته جيئن شفافيت يقيني بڻائي سگهجي ۽ دوکيبازي جي روڪٿام ڪري سگهجي. لنڊن ۾ پاڪستان هاءِ ڪميشن جي هڪ مخصوص لينڊ سروسز ڊيسڪ پائليٽ مرحلي جي معاونت ڪندو جنهن کي بعد ۾ برطانيا ۾ ٻين پاڪستاني قونصلخانن تائين وسعت ڏني ويندي. اهڙي طرح ون ونڊو پاسپورٽ پروسيسنگ سسٽم جيڪو ڊائريڪٽوريٽ جنرل آف اميگريشن اينڊ پاسپورٽس جي ذريعي لاڳو ڪيو ويو آهي، پاسپورٽ درخواست جي مرحلن کي گڏ ڪري هڪ ئي ڪائونٽر تي انتهائي موثر طريقي سان مڪمل ڪندو. ان نظام تحت درخواست جي پروسيسنگ جو وقت اٽڪل 10 منٽن تائين رهجي ويندو جنهن سان سهولت ۾ اضافو ٿيندو، رش گهٽ ٿيندي ۽ شفافيت وڌندي. ان موقعي تي نائب وزيراعظم ۽ پرڏيهي وزير اسحاق ڊار ڳالهه ٻولهه ڪندي انهن قدمن کي پاڪستاني ڪميونٽي جي حقن جي تحفظ ۽ سيڙپڪاري کي فروغ ڏيڻ طرف هڪ اهم ڊيجيٽل قدم قرار ڏنو. هن پرڏيهي وزارت، پنجاب لينڊ روينيو اٿارٽي، نادرا ۽ لنڊن ۾ پاڪستاني هاءِ ڪميشن جي گڏيل ڪوششن کي ساراهيو، جن ٻاهرئين ملڪ رهندڙ پاڪستانين جي لاءِ جديد، جوابده ۽ موثر خدمتن جي حڪومتي پاليسي کي عملي شڪل ڏيڻ ۾ اهم ڪردار ادا ڪيو.
