اسلام آباد – 19 آگسٽ (اي پي پي) وزيراعظم محمد شهباز شريف چيو آهي ته رضاڪار خدمتگار بنا ڪنهن شڪ جي حادثن، قدرتي آفتن ۽ ٻين ايمرجنسي حالتن ۾ پنهنجي ڀرپاسي علائقن ۾ فوري امداد پهچائڻ ۾ اهم ڪردار ادا ڪن ٿا، اسان پنهنجي ايندڙ نسلن کي انسانيت پرور ۽ پنهنجي روشن معاشرتي بنياد سان لاڳاپيل تربيت ڏينداسين. انسانيت جي عالمي ڏينهن جي موقعي تي پنهنجي پيغام ۾ وزيراعظم محمد شهباز شريف چيو ته پاڪستان عالمي دنيا سان گڏ اڄ جي ڏينهن انسانيت، انساني قدرن، اخلاقيات ۽ تهذيب ۽ تمدن جي علمبردارن کي خراج تحسين پيش ڪري ٿو، انسانيت جو عالمي ڏينهن هن سال ”عالمي خيرسگالي جذبي ۽ مقامي ڪميونٽي جي اهميت ۽ مضبوطي“ جي عنوان سان ملهايو پيو وڃي. هن چيو ته پاڪستان جي لاءِ اڄ جو ڏينهن انسانيت جي خدمت ۽ حفاظت جي جذبي جي لاءِ نئين عزم ۽ وچن ورجائڻ جو موقعو آهي، اسان سچي دل سان انهن سمورن رضاڪارن جي عزم ۽ همت، بهادري ۽ اڻٿڪ جذبي کي سلام پيش ڪريون ٿا جيڪي مصيبت ۾ ورتل ماڻهن کي امداد پهچائين ٿا. وزيراعظم چيو ته رضاڪار خدمتگار بنا ڪنهن شڪ جي حادثن، قدرتي آفتن ۽ ٻين ايمرجنسي حالتن ۾ پنهنجي ڀرپاسي علائقن ۾ فوري امداد پهچائڻ ۾ اهم ڪردار ادا ڪن ٿا، اسان جي معاشري ۾ بي لوث خدمت، ٻين جي امداد ۽ فلاحي ڪمن ۾ شرڪت کي قدر جي نگاهه سان ڏٺو وڃي ٿو، انسانيت جي خدمت جو اهو پرخلوص جذبو پاڪستان جي سماجي ۽ معاشرتي قدرن ۽ تهذيب جو اثاثو آهي ۽ اسان قوم جي حيثيت سان ان تي فخر ڪريون ٿا ۽ ان ڳالهه جو ورجاءُ پڻ ڪريون ٿا ته اسان پنهنجي ايندڙ نسلن کي انسانيت پرور ۽ پنهنجي روشن معاشرتي بنياد سان واڳيل تربيت ڏينداسين. هن چيو ته هڪ ٻيو قابل فخر رويو جيڪو اسان جي معاشري جو اهم عنصر آهي، اهو عورتن، بزرگ ۽ ٻارن جي خصوصي حفاظت ۽ عزت ۽ تڪريم آهي، ڪنهن به اڻوڻندڙ آفت ۽ حالتن ۾ انهن طبقن کي مدد ۽ تحفظ جي وڌيڪ ضرورت هوندي آهي، اسان جو معاشرو بحيثيت مجموعي انسانيت جي خدمت جي لاءِ هر وقت تيار نظر اچي ٿو. هن چيو ته هن سال موسمي حالتن جي شدت ملڪ جي ڪنڊڪڙڇ ۾ غيرمعمولي صورتحال کي جنم ڏنو ۽ اسان وفاقي ۽ صوبائي حڪومتن، حڪومتي ادارن سان عوام کي پڻ امدادي ڪاررواين ۾ رضاڪاراڻي طور تي اڳتي ڏٺو. هن چيو ته اسان جي عوام ٻي هنگامي صورتحال جنهن ۾ بک، غربت، بيروزگاري، جنگي حالتون شامل آهن، ان ۾ به هڪ ٻئي کي پنهنجي سگهه موجب سهولت ۽ امداد پهچائين ٿا، اسان جو ملڪ دنيا ۾ عطيو ڪندڙ سرفهرست ملڪن ۾ اچي ٿو، انهي جذبي ۽ قرباني جي ڪري ڪو غريب بکيو نه ٿو رهي. وزيراعظم چيو ته پاڪستان حڪومت سمورن شهرين جي حقن جي تحفظ ۽ انهن جي زندگي جو معيار بهتر بڻائڻ لاءِ پرعزم آهي ۽ گڏوگڏ رضاڪار خدمتگارن جي حفاظت ۽ حوصلا افزائي پڻ حڪومت جي ترجيحن ۾ شامل آهي. هن چيو ته اچو هن ڏينهن کي بحيثيت قوم ان عزم سان ملهايون ته نه رڳو پنهنجي مقامي علائقي، شهر، ملڪ پر حسب توفيق سڄي دنيا ۾ انسانيت جي حفاظت ۽ انساني قدرن جي فروغ جي لاءِ تعميري ۽ موثر ڪردار ادا ڪرڻو آهي
