تيانجن- 30 آگسٽ (اي پي پي) وزيراعظم محمد شهباز شريف چين جي سرڪاري دوري تي تيانجن پهچي ويو آهي. وزيراعظم شنگھائي تعاون تنظيم (ايس سي او) سربراهي اجلاس، بيجنگ ۾ چيني عوامي جنگ جي فتح جي 80هين سالگرهه ۽ ٻين اهم سرڪاري مصروفيتن ۾ شرڪت ڪندو. وزيراعظم سان گڏ پاڪستاني وفد ۾ نائب وزيراعظم ۽ پرڏيهي وزير محمد اسحاق ڊار، منصوبابندي ۽ ترقي جو وفاقي وزير ڊاڪٽر احسن اقبال، اطلاعات ۽ نشريات جو وفاقي وزير عطاءُ الله تارڙ ۽ اعليٰ سرڪاري عملدار شامل آهن. تيانجن ايئرپورٽ تي وزيراعظم جو جنرل ايڊمنسٽريشن آف ڪسٽمز جي سي پي سي ڪميٽي جي وزير ۽ سيڪريٽري سن ميجن، تيانجن ميونسپل پيپلز ڪانگريس جي اسٽينڊنگ ڪميٽي جي چيئرمين ۽ پارٽي سيڪريٽري يو يون لين، پاڪستان ۾ چيني سفير جيانگ زائيڊونگ چين ۾ پاڪستاني سفير خليل هاشمي گرمجوشي سان استقبال ڪيو. وزيراعظم شهباز شريف 31 آگسٽ کان پهرين سيپٽمبر 2025ع تائين تيانجن ۾ منعقد ٿيندڙ ايس سي او ڪائونسل آف هيڊز آف اسٽيٽ اجلاس ۾ شرڪت ۽ خطاب ڪندو. ان موقعي تي هو چيني صدر شي جن پنگ ۽ وزيراعظم لي ڪيانگ سان ٻطرفيُون ملاقاتون ڪندو جن ۾ گڏيل دلچسپي، اقتصادي تعاون ۽ خطي جي مجموعي صورتحال تي غورويچار ڪيو ويندو. چين جي پنهنجي دوري دوران، وزيراعظم ناليوارين چيني ڪاروباري شخصيتن سان ملاقات ڪندو ۽ 4 سيپٽمبر تي بيجنگ ۾ ٻئي پاڪستان-چين بي ٽو بي سيڙپڪاري ڪانفرنس جي صدارت به ڪندو. ڪانفرنس جو مقصد ٻنهي ملڪن جي وچ ۾ واپار ۽ سيڙپڪاري لاڳاپن کي وڌيڪ وڌائڻ ۽ گڏيل تعاون جا نوان موقعا ڳولڻ آهي. وزيراعظم شهباز شريف ايس سي او اجلاس جي موقعي تي ٻين ميمبر ملڪن جي اڳواڻن سان به ملاقات ڪندو.
