اسلام آباد -30 آگسٽ (اي پي پي) صدر آصف علي زرداري پاڪستان لينڊ پورٽ اٿارٽي بل 2025 جي منظوري ڏئي ڇڏي آهي. صدارتي منظوري کان پوءِ اهو بل هاڻي ايڪٽ بڻجي ويو آهي. اهو قانون پاڪستان لينڊ پورٽ اٿارٽي جي قيام جي راهه هموار ڪري ٿو، اهو هڪ قانوني ادارو آهي جيڪو سرحدي ڪراسنگ پوائنٽس جي ٻئي پاسي سامان ۽ ماڻهن جي چر پر ۾ سهولت فراهم ڪندو آهي. ايوان صدر جي ميڊيا ونگ مان جاري بيان موجب اٿارٽي انٽر ايجنسي ڪو آرڊينيشن لاءِ هڪ مرڪزي پليٽ فارم طور ڪم ڪندي جيڪا زميني بندرگاهن تي اثرائتي واپار ۽ مسافرن جي اچ وڃ کي يقيني بڻائيندي. پاڪستان، بنگلاديش ۽ ڀارت کان پوءِ ڏکڻ ايشيا جو ٽيون ملڪ بڻجي ويو آهي جنهن لينڊ پورٽ اٿارٽي قائم ڪئي. اٿارٽي بارڊر مينيجمينٽ ايجنسين سان اثرائتي طريقي سان هم آهنگي پيدا ڪرڻ، واپاري سهولتڪاري کي هموار ڪرڻ ۽ سرحد پار رابطن کي وڌائڻ لاءِ هڪ مضبوط طريقيڪار متعارف ڪرائيندي، اهو عالمي معاهدن ۽ ڪنوينشنز تحت پاڪستان جي ذميوارين کي پورو ڪرڻ ۾ به اهم ڪردار ادا ڪندو. پاڪستان لينڊ پورٽ اٿارٽي جو قيام پاڪستان جي علائقائي، واپاري انضمام کي مضبوط، بارڊر مينيجمينٽ کي بهتر ۽ پاڙيسري ملڪن سان اقتصادي رابطا وڌائڻ طرف اهم قدم آهي.
