اسلام آباد -30 آگسٽ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار چيو آهي، ته چين سان پاڪستان جي اسٽريٽجڪ شراڪتداري اعتماد تي ٻڌل آهي، اسان صدر شي جن پنگ جي قيادت، بيلٽ اينڊ روڊ انيشيئيٽو، عالمي ترقي، سلامتي ۽ تهذيب جي حوالي سان کنيل قدمن کي قدر جي نگاهه سان ڏسون ٿا. پرڏيهي وزارت پاران جاري بيان موجب تيانجن ۽ بيجنگ ۾ وزيراعظم شهباز شريف جي قيادت ۾ ايس سي او ملڪن جي سربراهن وارن اجلاسن ۾ پاڪستان جي شرڪت کان اڳ نائب وزيراعظم سينيٽر محمد اسحاق ڊار سي جي ٽي اين جي گلوبل سائوٿ وائيسز تي پاڪستان جو نقطئه نظر پيش ڪيو جنهن ۾ پاڪ -چين لاڳاپن جي گهرائي ۽ اسان جي خطي لاءِ ايس سي او جي وڌندڙ اهميت کي اجاگر ڪيو. ان موقعي تي ڳالهائيندي نائب وزيراعظم ۽ پرڏيهي وزير سينيٽر محمد اسحاق ڊار چيو ته چين سان پاڪستان جي گڏيل موسمي اسٽريٽجڪ شراڪتداري اعتماد ۽ اسٽريٽجڪ صف بندي تي ٻڌل آهي، اسان صدر شي جن پنگ جي قيادت، بيلٽ اينڊ روڊ انيشيئيٽو ، عالمي ترقي، سلامتي ۽ تهذيب جي حوالي سان سندن قدمن کي قدرجي نگاهه سان ڏسون ٿا. هن چيو ته شنگهائي تعاون تنظيم هڪ اهم يوريشين پليٽ فارم بڻجي ويو آهي جيڪو گڏيل اعتماد ۽ گڏيل ترقي جي اصولن تحت سلامتي، واپار، توانائي، رابطن ۽ ثقافت ۾ سهڪار کي اڳيان وڌائي رهيو آهي. اڄ ملٽي پلائير دنيا ۾ گهڻ رخي، استحڪام ۽ جامع ترقي کي هٿي ڏيڻ ۾ ايس سي او جو ڪردار اڳ کان ڪيترائي ڀيرا اهم آهي. اسحاق ڊار چين لاءِ اهم ترين ڪانفرنس جي ميزباني ۾ هر طرح جي ڪاميابي جي خواهش جو اظهار ڪيو. هن چيو ته اسان چيني قيادت ۽ شنگهائي تعاون تنظيم جي ٻين ميمبر ملڪن جي سربراهن سان اعليٰ سطحي تعميري ڳالهين جا پڻ منتظر آهيون.
