ڪراچي-29 آگسٽ (اي پي پي) سنڌ جي سينئر وزير شرجيل انعام ميمڻ چيو آهي ته سنڌ حڪومت امڪاني ٻوڏ جي صورتحال کي منهن ڏيڻ لاءِ هر سطح تي جامع ۽ هنگامي قدم کنيا آهن، سمورا وزير، چونڊيل نمائندا ۽ ضلعي انتظاميا پنهنجن پنهنجن علائقن ۾ موجود آهن ۽ ماڻهن جي جان ۽ مال جي حفاظت کي پھرين اوليت ڏني پئي وڃي.هڪ بيان ۾، سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ چيو ته صوبائي وزير سيد ناصر حسين شاهه، ڄام خان شورو، سردار محمد بخش مهر، مڪيش ڪمار چاولا، ڄام اڪرام الله ڌاريجو سميت سڄي ڪابينا سنڌ جي وڏي وزير جي هدايتن تي مختلف ضلعن جو دورو ڪري رهي آهي، بندن جي مضبوطي، نگراني ۽ عوامي سهولتن جي فراهمي جو جائزو وٺي رهي آهي. ڊپٽي ڪمشنر، پوليس، آبپاشي ۽ ريسڪيو ادارا هر ضلعي ۾ الرٽ آهن، جڏهن ته مشينري، ٻيڙين ۽ عارضي رهائش جا انتظام پڻ مڪمل ڪيا ويا آهن.شرجيل انعام ميمڻ چيو ته گڊو، سکر ۽ ڪوٽڙي بئراجن تي پاڻي جي مٿانھين ۽ ھيٺاھين وھڪري جي لڳاتار نگراني ڪئي پئي وڃي. هن وقت صورتحال ڪنٽرول ۾ آهي، سنڌ سرڪار ڪنهن به هنگامي صورتحال کي منهن ڏيڻ لاءِ متبادل منصوبا تيار ڪيا آهن.هن چيو ته چيئرمين بلاول ڀٽو زرداري ۽ صدر آصف علي زرداري واضح هدايتون ڏنيون آهن ته ماڻهن جي حفاظت کي هر صورت ۾ يقيني بڻايو وڃي، سنڌ جو وڏو وزير سيد مراد علي شاهه پاڻ انتظامن جي سڌي طرح نگراني ڪري رهيو آهي ۽ روزانو بريفنگ وٺي رهيو آهي.سينئر وزير شرجيل انعام ميمڻ عوام کي اپيل ڪئي ته عوام افواهن تي ڌيان نه ڏئي، سرڪاري ادارن سان سھڪار ۽ حڪومتي هدايتن تي عمل ڪري.هن وڌيڪ چيو ته اسان سڀني کي گڏجي هن ڏکئي وقت کي منهن ڏيڻو آهي، سنڌ سرڪار مڪمل طور تي تيار آهي ۽ انشاءَ الله، ماڻهن کي محفوظ رکڻ لاءِ ڪا به ڪسر نه ڇڏي ويندي.
