لاهور -30 آگسٽ(اي پي پي)وزيراعظم محمد شهباز شريف چين جي سرڪاري دوري تي تيانجن روانو ٿي ويو آهي. وزيراعظم هائوس جي ميڊيا ونگ پاران جاري بيان موجب چين جي صدر شي جن پنگ وزيراعظم کي چين جي دوري جي دعوت ڏني آهي، نائب وزيراعظم ۽ پرڏيهي وزير سينيٽر محمد اسحاق ڊار، اطلاعات ۽ نشريات وارو وفاقي وزير عطاالله تارڙ ۽ وزيراعظم جو صلاحڪار طارق فاطمي پڻ ساڻس گڏ آهن. وزيراعطم پنهنجي دوري ۾ 25هين شنگهائي تعاون تنظيم جي سربراهي اجلاس ۾ شرڪت ۽ خطاب ڪندو، هو خطي ۾ پاڪستان پاران امن جي ڪوششن، علائقائي رابطن ۾ اضافي ۽ خطي جي عوام جي ترقي کي هٿي ڏيارڻ جي حوالي سان موقف به پيش ڪندو. محمد شهباز شريف خطي ۾ موجود ملڪن تي موسمياتي تبديلي جي ناڪاري اثرن سميت وڌندڙ قدرتي آفتن جي نئين چئلينجن تي به روشني وجهندو. وزيراعظم سربراهي اجلاس ۾ شريڪ عالمي اڳواڻن سان ملاقاتون به ڪندو. جنهن کان پوءِ وزيراعظم چين جي گادي واري هنڌ بيجنگ ويندو، جتي هو صدر شي جن پنگ جي خاص دعوت تي چيني پيپلز وار آف ريزسسٽنس ۾ سوڀ جي 80هين سالياني تقريبن ۾ شرڪت ڪندو. وزيراعظم جي چيني صدر شي جن پنگ ۽ وزيراعظم لي چيانگ سان ٻه طرفيون ملاقاتون به ٿينديون. وزيراعظم چين پاڪستان واپاري لاڳاپن کي هٿي وٺائڻ ۽ پاڪستان ۾ چين جي سيڙپڪاري ۾ اضافي لاءِ چين ۾ منعقد ٻي بزنس ٽو بزنس سيڙپڪاري ڪانفرنس جي صدارت به ڪندو. وزيراعظم محمد شهباز شريف چين جي ڪمپنين جي سربراهن سان به ملاقاتون ڪندو ۽ کين حڪومت جي سيڙپڪار دوست پاليسين بابت آگاهي سان گڏوگڏ پاڪستان ۾ سيڙپڪاري جي دعوت به ڏيندو.
