اسلام آباد – 17 – جنوري (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار پاڪستان جي مقامي اليڪٽرو آپٽيڪل اي او ون سيٽلائيٽ جي ڪامياب لانچ کي پاڪستان جي خلائي سفر ۾ هڪ اهم ڪاميابي قرار ڏنو آهي. نائب وزيراعظم سوشل ميڊيا پليٽ فارم ايڪس تي پنهنجي پيغام ۾ پاڪستان اسپيس اينڊ اپر ايٽموسفيئر ريسرچ ڪميشن (اسپارڪو) کي ان سنگ ميل کي حاصل ڪرڻ تي مبارڪباد ڏني. هن چيو ته اها ڪاميابي ملڪ جي قدرتي وسيلن جي نگراني، قدرتي آفتن جي اڳڪٿي ۽ ان جو جواب ڏيڻ، صحيح فصل جي ذريعي خوراڪ جي حفاظت ۾ مدد ۽ باخبر فيصلاسازي جي ذريعي معاشي ترقي کي اڳتي وڌائڻ جي لاءِ تيار آهي. هن چيو ته آئون پاڪستان اسپيس اينڊ اپر ايٽموسفيئر ريسرچ ڪميشن (اسپارڪو) کي اڄ پاڪستان جو مقامي اليڪٽرو آپٽيڪل سيٽلائيٽ لانچ ڪرڻ تي مبارڪباد ڏيان ٿو. نائب وزيراعظم سينيٽر محمد اسحاق ڊار چيو ته مقامي طور تي تيار ڪيل اي او ون سيٽلائيٽ جو لانچ اسپارڪو جي مهارت ۽ پرامن مقصدن جي لاءِ خلائي ٽيڪنالاجي حاصل ڪرڻ جي لاءِ پاڪستان حڪومت جي عزم جو ثبوت آهي.
