راولپنڊي– 15 جون (اي پي پي) پاڪ فوج جي سڌ سماءَ واري کاتي (آءِ ايس پي آر) جي ڊائريڪٽر جنرل ليفٽننٽ جنرل عاصم سليم باجوه چيو آهي ته دهشتگردي خلاف پاڪ فوج جي آپريشن ضرب عضب جي پهرين ٻن سالن ۾ 100 سيڪڙو هدف حاصل ڪيا ويا آهن. آءِ ايس پي آر راولپنڊي ۾ آپريشن ضرب عضب جا 2 سال مڪمل ٿيڻ تي هيل تائين ٿيل ڪاميابين بابت ميڊيا کي بريفنگ ڏئي رهيو هو. ڊي جي آءِ ايس پي آر ٻڌايو ته انگور اڊا گيٽ پاڪستان جي حدن ۾ نه هو، سڀئي معاملا فوجي ۽ سياسي قيادت جي مشاورت سان طئه ڪيا ويا آهن، آپريشن ضرب عضب ۾ 3500 دهشتگرد مارجي ويا، 992 دهشتگردن جي ٺڪاڻن کي نشانو بڻايو ويو، 253 ٽن ڌماڪيدوار مادو، 2841 باردوي سرنگهون ۽ 35 هزار 310 مارٽر بم پڪڙيا آهن. ڪراچي ۾ امن بحال ڪرڻ لاءِ اثرائتو آپريشن ڪيو ويو آهي.
