اسلام آباد – 22 جون (اي پي پي) پاڪستان ۽ قطر جي وچ ۾ واپار ۽ سيڙپڪاري ۾ تعاون جي لاءِ ورڪنگ گروپ قائم ڪرڻ، سياحت ۽ واپار جي ترقي لاءِ تعاون سميت مني لانڊرنگ، دهشتگردي جي مالي مدد جي خاتمي ۽ ڳجهي معلومات جي مٽاسٽا بابت ٺاهه طئي ٿي ويا. قطر جو امير شيخ تميم بن حمد الثاني ۽ وزيراعظم عمران خان پڻ وزيراعظم هائوس ۾ تقريب ۾ موجود هئا. ان کان اڳ وزيراعظم عمران خان ۽ قطر جي امير جي وچ ۾ نويڪلائي ۾ ملاقات ٿي ۽ وفدن جي سطح تي ڳالهيون پڻ ٿيون.
