فلوريڊا -04 آگسٽ (اي پي پي) پاڪستان ويسٽ انڊيز کي ٽين ۽ فيصلائتي ٽي – ٽوئنٽي انٽرنيشنل ميچ ۾ 13 رنسن تان شڪست ڏئي سيريز 2-1 تان کٽي ورتي آهي. صاحبزاده فرحان ۽ صائم ايوب جي شاندار ففٽين عيوض پاڪستان ميزبان ويسٽ انڊيز کي ٽين ۽ فيصلائتي ٽي ٽوئنٽي انٽرنيشنل ميچ ۾ 13 رنسن تان شڪست ڏئي 3 ميچن جي سيريز 2-1 تان پنهنجي نالي ڪري ورتي. آخري ۽ فيصلائتي ميچ ۾ پهرين بيٽنگ ڪندي مقرره 20 اوورن ۾ پاڪستان جي ٽيم 4 وڪيٽن جي نقصان تي 189 رنسون اسڪور ڪيون ۽ ميزبان ويسٽ انڊيز جي ٽيم پاڪستان طرفان مليل 190 رنسن جو هدف حاصل ڪرڻ ۾ ناڪام رهي، پاڪستاني بالرز جي بهترين بائولنگ عيوض ويسٽ انڊيز جي ٽيم گهربل هدف حاصل ڪرڻ جي ڪوشش ۾ مقرره 20 اوورن ۾ 6 وڪيٽن جي نقصان تي 176 رنسون ٺاهي سگهي. پاڪستان طرفان صاحبزاده فرحان 74 ۽ صائم ايوب 66 رنسن جي بهترين اننگز کيڏي پنهنجي ٽيم جي فتح ۾ اهم ڪردار ادا ڪيو. ويسٽ انديز طرفان جيسن هولڊر، روسٽن چيز ۽ شمار جوزف هڪ هڪ رانديگر کي آئوٽ ڪيو. جواب ۾ ويسٽ انڊيز طرفان ايلڪ ايٿنيز 60 ۽ شيرفين ردرفورڊ 51 رنسن سان نمايان بيٽسمين رهيا، ٻنهي رانديگرن ففٽيون ٺاهيون. پاڪستان طرفان بهترين بالنگ جو مظاهرو ڪندي حسن علي، محمد نواز، حارث روئوف، صائم ايوب ۽ سفيان مقيم هڪ هڪ رانديگر کي آئوٽ ڪيو. پاڪستان جي بهترين اوپننگ بيٽسمين صاحبزاده فرحان کي ميچ جو جڏهن ته محمد نواز کي سيريز جو بهترين رانديگر قرار ڏنو ويو.
