تيانجن-31 آگسٽ (اي پي پي)وزيراعظم محمد شهباز شريف چيو آهي ته پاڪ چين دوستي گڏيل اعتماد، احترام ۽ سچي محبت جي بنياد تي قائم آهي، چين سان مضبوط دوستي تي فخر آهي، پاڪستان ۽ چين هر مشڪل ۾ هڪٻئي جو ساٿ ڏنو آهي، غربت جي خاتمي ۽ گڏيل خوشحالي جو صدر شي جن پنگ جو ويزن اسان لاءِ مشعل راهه آهي، بدعنواني ۽ غربت جو خاتمو اسان جي حڪومت جي ترجيح آهي، اسان کي پنهنجي نوجوانن جي صلاحيتن مان فائدو کڻڻو آهي، پاڪ چين دوستي جي مشعل هاڻي نوجوانن جي هٿن ۾ آهي، اًچو ته گڏجي ترقي ۽ خوشحالي جو هڪ نئون باب لکون. اهڙو اظهار هن گذريل ڏينهن تيانجن يونيورسٽي ۾ فيڪلٽي ميمبرن ۽ شاگردن کي خطاب ڪندي ڪيو. ان موقعي تي نائب وزيراعظم ۽ پرڏيهي وزير اسحاق ڊار، رٿابندي ۽ ترقي وارو وفاقي وزير احسن اقبال، سڌ سماءَ وارو وفاقي وزير عطا الله تارڙ، وزيراعظم جو خاص مددگار طارق فاطمي ۽ سندس وفد جا ٻيا ميمبر به موجود هئا. وزيراعظم چيو ته تيانجن يونيورسٽي ۾ موجودگي منهنجي لاءِ فخر جوڳي آهي، پهريون ڀيرو 2017ع ۾، مون هن يونيورسٽي جو دورو ڪيو هو ۽ پاڪستاني ۽ چيني شاگردن سان ملاقات ڪئي هئي، تيانجن يونيورسٽي علم ۽ دانش جي بهترين درسگاهه آهي، يونيورسٽي بهترين سائنسدان ۽ مفڪر تيار ڪيا آهن، يونيورسٽي مان پاس ٿيل شاگردن چين جي ترقي جي سفر ۾ ڀرپور ڪردار ادا ڪيو آهي، مون کي پاڪستاني شاگردن جو وڏو انگ ڏسي خوشي ٿي آهي، 200 کان وڌيڪ پاڪستاني شاگرد تيانجن يونيورسٽي ۾ تعليم پرائي رهيا آهن، منهنجو اوهان لاءِ پيغام آهي ته الله تعاليٰ اوهان کي موقعو ڏنو آهي ان عظيم درسگاهه مان جديد تعليم سان ليس ٿيو، پاڪستان جا عظيم سفير هجڻ جي ناطي محنت سان تعليم حاصل ڪيو، وقت جي پابندي ڪريو، اسان کي اوهان مان وڏيون اميدون آهن ته اوهان پاڪستان جي ترقي ۾ ڀرپور ڪردار ادا ڪندا. پاڪستان ۽ چين جي دوستي کي هٿي ڏيندا، جنهن دوستي جو بنياد اسان جي پهرين نسلن رکيو هو. هن چيو ته پاڪ چين دوستي گڏيل اعتماد، احترام ۽ سچي محبت جي بنياد تي قائم آهي، اسان جي دوستي هر آزمائش تي پوري لٿي آهي، پاڪستان ۽ چين هر مشڪل وقت ۾ هڪٻئي جو ساٿ ڏنو آهي. هن چيو ته ڪيتريون ئي تبديليون به اينديون رهيون آهن پر اسان جي دوستي مضبوط کان مضبوط ٿيندي رهندي ، اسان جي منزل هڪ آهي، پاڪ چين دوستي ۽ لاڳاپا ايترا ئي پراڻا آهن جيتري شاهراهه ريشم آهي، پاڪستان ۽ چين تاريخي ۽ ثقافتي لحاظ کان هڪٻئي سان ڳنڍيل آهن. هي اسان جو واضح ويزن آهي ته پاڪستان ۽ چين جي دوستي هميشه هميشه قائم رهندي، شاهراهه قراقرم ٻنهي ملڪن وچ ۾ دوستي جو عظيم منصوبو آهي، پاڪستان مسلمان دنيا جو پهريون ملڪ هو جنهن عوامي جمهوريه چين کي تسليم ڪيو، 60 سال اڳ بيجنگ ويندڙ پهرين عالمي اڏام ڪراچي کان رواني ٿي، وزيراعظم چيو ته عظيم شاعر مشرق علامه محمد اقبال چيني قوم جي قابليت ۽ صلاحيتن کي ڄاڻيندو هو. شاعر مشرق هڪ صدي اڳ چين جي ترقي جي اڳڪٿي ڪئي هئي، چين هن وقت دنيا جي سڀ کان وڏي معيشتن ۾ شامل آهي ۽ اسان کي پاڪستاني جي حيثيت سان ان تي فخر آهي، چين 80 ڪروڙ کان وڌيڪ ماڻهن کي غربت جي لڪير مان ڪڍيو آهي ۽ هي هڪ وڏي ڪاميابي ۽ دنيا لاءِ ماڊل آهي، چين اڄ دنيا جي هڪ وڏي معاشي ۽ فوجي طاقت آهي، اسان کي چين سان پنهنجي مضبوط دوستي تي فخر آهي، چين جي وزنري ليڊر صدر شي جن پنگ جي گڏيل خوشحالي جي ويزن دنيا کي پنهنجو حامي بڻائي ڇڏيو آهي، پاڪستان صدر شي جن پنگ جي ويزن ۽ فلسفي جي مڪمل حمايت ڪري ٿو، عوام جي ڀلائي ۽ ترقي چين جي حڪومت جي ترجيح آهي. هن چيو ته صدر شي جن پنگ گڏيل خوشحالي، ترقي کي هٿي وٺرائڻ ۽ بدعنواني جي خاتمي تي يقين رکي ٿو، اها ئي منهنجي پاڪستان ۾ پاليسي آهي، منهنجي حڪومت خلاف هڪ پئسي جي ڪرپشن جو الزام به ناهي، شفافيت ۽ اڻٿڪ محنت قومن جي تقدير بدلائي سگهي ٿي، غربت جي خاتمي ۽ گڏيل خوشحالي جو صدر شي جن پنگ جو ويزن اسان لاءِ مشعل راهه آهي، چين جيڪڏهن اڄ دنيا جي وڏي معاشي ۽ فوجي قوت آهي ته اهو صرف ڳالهين سان نه پر عملي طريقي سان ممڪن ٿيو آهي، صنعتي، زرعي، سائنس ۽ ٽيڪنالاجي ۽ ٻين شعبن ۾ ترقي لاءِ پاڪستان چين جي پيروي ڪري رهيو آهي. پاڪستان ۽ چين جي دوستي هماليه کان اونچي آهي. هن چيو ته پاڪستان جي 60 سيڪڙو آباد نوجوانن تي ٻڌل آهي، اسان کي چين جي ماڊل مان سکڻ جي ضرورت آهي. هن چيو ته 30 هزار جي لڳ ڀڳ پاڪستاني چين ۾ تعليم پرائي رهيا آهن، اسان کي نوجوانن جي صلاحيتن مان فائدو کڻڻو آهي، اهي شاگرد جديد تحقيق، موجوده دور جي تعليم ۽ فني مهارتن مان فائدو کڻي رهيا آهن، فني تربيت اڄ جي دور جي ضرورت آهي، اسان چين جي تعاون سان فني ۽ پيشيوراڻي تربيت کي هٿي ڏيڻ جا خواهشمند آهيون، تعليم جي ميدان ۾ پاڪستاني ۽ چين يونيورسٽين جي تعاون جا مثبت نتيجا سامهون اچي رهيا آهن، اسان پنهنجي شاگردن تي جيڪو ڪجهه خرچ ڪنداسين اها اسان جي سيڙپڪاري هوندي جنهن جا فائدا مستقبل ۾ اسان کي حاصل ٿيندا. وزيراعظم چيو ته اسان هزارين شاگردن کي چين ۾ تعليم ۽ تربيت لاءِ موڪلي رهيا آهيون، 600 پاڪستاني زرعي گريجوئيٽس چين مان پنهنجي تربيت مڪمل ڪري ورتي آهي، هواوي ڪتاب سان به پاڪستاني نوجوانن کي آءِ ٽي جي شعبي ۾ هنرمند بڻائڻ جا پروگرام جاري آهن، اسان وڌيڪ چيني ڪمپنين سان به آءِ ٽي، اي آءِ ۽ ٻيا پروگرام حاصل ڪرڻ جا خواهشمند آهيون، پاڪ چين دوستي جي مشعل هاڻي نوجوانن جي هٿن ۾ آهي، اچو ته گڏجي ترقي ۽ خوشحالي جي دور جو هڪ نئون باب لکون. ان کان اڳ وزيراعظم پنهنجي خطاب جي شروعات قرآن پاڪ جي آيتن جي تلاوت سان ڪيو. وزيراعظم يونيورسٽي ۾ تعليم پرائيندڙ پاڪستاني شاگردن سان ملاقات ڪئي، وزيراعظم کي يونيورسٽي جي باري ۾ بريفنگ به ڏني وئي. وزيراعظم کي ٻڌايو ويو ته تيانجن يونيورسٽي جو ڳاڻيٽو چين جي قديم درسگاهن ۾ ٿئي ٿو، يونيورسٽي ۾ انجنيئرنگ، سائنس، مينيجمينٽ، قانون، آرٽس ۽ طب جي اعليٰ تعليم ڏني پئي وڃي، تيانجن يونيورسٽي جو چين جي صنعتي ترقي ۾ اهم ڪردار آهي، پاڪستان ۽ چين جي شاگردن وچ ۾ يونيورسٽي پل جو ڪردار ادا ڪري رهي آهي.
