دبئي – 21 آگسٽ (اي پي پي) انٽرنيشنل ڪرڪيٽ ڪائونسل (آءِ سي سي) جي انتظام ھيٺ پاڪستان، افغانستان ۽ گڏيل عرب امارات (يو اي اي) وچ ۾ ٽي ملڪي ٽي-20 ٽرائي سيريز جي شروعات 29 آگسٽ تي يو اي اي ۾ ٿيندي، جنھن ۾ شرڪت لاءِ پاڪستان جي ڪرڪيٽ ٽيم دبئي پھچي وئي آھي. پاڪستان جي ٽيم ٽه ملڪي سيريز کان اڳ دبئي ۾ تياريون شروع ڪري ڇڏيون آھن. آءِ سي سي اڪيڊمي ۾ رانديگرن ٽن ڪلاڪن تائين پريڪٽس سيشن ۾ حصو ورتو. ڪوچز جي نگراني ھيٺ بيٽرز ۽ بالرز نيٽ تي تربيت ڪئي. ان کان اڳ فزيڪل ۽ فيلڊنگ ڊرلز ڪيون ويون. پاڪستان، افغانستان ۽ گڏيل عرب امارات (يو اي اي) وچ ۾ ٽي ملڪي ٽي-20 ٽرائي سيريز 29 آگسٽ کان 7 سيپٽمبر تائين تاريخي شارجه ڪرڪيٽ اسٽيڊيم ۾ منعقد ٿيندي، سيريز جي شروعاتي ميچ 29 آگسٽ تي پاڪستان ۽ افغانستان جي ڪرڪيٽ ٽيمن وچ ۾ کيڏي ويندي. ٽي ملڪي ٽي-20 ٽرائي سيريز ۾ شامل ھر ٽيم ٽورنامينٽ ۾ ٻين ٻن ٽيمن خلاف 2، 2 ميچون کيڏندي جڏھن ته 7 سيپٽمبر تي ٽاپ ٻن ٽيمن وچ ۾ فائنل ميچ کيڏي ويندي. آءِ سي سي ان سلسلي ۾ اڳ ئي ٽي ملڪي ٽي-20 ٽرائي سيريز جو شيڊول جاري ڪري ڇڏيو آھي جنھن جون سموريون ميچون شارجه ڪرڪيٽ اسٽيڊيم ۾ کيڏيون وينديون. ٽي ملڪي ٽي-20 ٽرائي سيريز جي پھرين ميچ پاڪستان ۽ افغانستان جي ٽيمن وچ ۾ 29 آگسٽ تي کيڏي ويندي، ٻي ميچ يو اي اي ۽ پاڪستان جي ٽيمن وچ ۾ 30 آگسٽ تي کيڏي ويندي، سيريز جي ٽئين ميچ يو اي اي ۽ افغانستان جي ٽيمن وچ ۾ 1 سيپٽمبر تي کيڏي ويندي، چوٿين ميچ پاڪستان ۽ افغانستان جي ٽيمن وچ ۾ 2 سيپٽمبر تي کيڏي ويندي ، پنجين ميچ پاڪستان ۽ يو اي اي جي ٽيمن وچ ۾ 4 سيپٽمبر تي کيڏي ويندي، ڇھين ميچ افغانستان ۽ يو اي اي جي ٽيمن وچ ۾ 5 سيپٽمبر تي کيڏي ويندي جڏھن ته ٽي ملڪي ٽي-20 سيريز جي ٽاپ 2 ٽيمن وچ ۾ فائنل ميچ 7 سيپٽمبر تي کيڏي ويندي. ٽي ملڪي ٽي-20 سيريز ٽنھي ٽيمن لاءِ ايشيا ڪپ کان اڳ ھڪ اھم وارم اپ موقعو فراھم ڪندي. پاڪستان جي ٽيم 21 کان 27 آگسٽ تائين پري سيريز ٽريننگ ڪيمپ ۾ به حصو وٺندي. جنھن دوران ٻه انٽر اسڪواڊ پريڪٽس ميچون به کيڏيون وينديون. واضح رھي ته ٽي ملڪي سيريز جي شروعات 29 آگسٽ کان ٿيندي ۽ فائنل 7 سيپٽمبر تي کيڏي ويندي. ٽي ملڪي سيريز مڪمل ٿيڻ بعد پاڪستان جو ايشيا ڪپ به يو اي اي ۾ ئي کيڏيو ويندو.
