اسلام آباد-22 آگسٽ (اي پي پي) گهرو وزير محسن نقوي جي صدارت ۾ فيڊرل انويسٽي گيشن ايجنسي (ايف آءِ اي) هيڊ ڪوارٽر اسلام آباد ۾ اعليٰ سطحي اجلاس ٿيو جنهن ۾ اميگريشن جي عمل کي آسان بڻائڻ ۽ انساني اسمگلنگ جي خاتمي لاءِ مصنوعي ذهانت تي تيار ڪيل ايپ بابت بريفنگ ڏني وئي، ان ايپ جو پائلٽ پراجيڪٽ اسلام آباد انٽرنيشنل ايئرپورٽ کان شروع ڪيو ويندو. ان قدم سان مسافرن کي قطارن کان ڇوٽڪارو ملڻ سان گڏوگڏ انساني اسمگلنگ جي روڪٿام ۾ به مدد ملندي. اجلاس ۾ اداري کي جديد بڻائڻ لاءِ گذريل اجلاس ۾ ڪيل فيصلن تي اڳڀرائي جو جائزو ورتو ويو. اجلاس ۾ گهرو وزير کي اميگريشن کي آسان بڻائڻ، انساني اسمگلنگ جي روڪٿام ۽ اداري جي ڊيجيٽلائزيشن جي عمل تي تفصيلي بريفنگ ڏني وئي. گهرو وزير محسن نقوي ايپ جي تياري کي وقت جي اهم ضرورت قرار ڏيندي چيو ته اها ايپ نه رڳو مسافرن لاءِ آساني پيدا ڪندي پر انساني اسمگلنگ خلاف جنگ ۾ سنگ ميل ثابت ٿيندي. هن آءِ ٽي انفراسٽريڪچر جي بهتري لاءِ گهربل فنڊز فوري فراهم ڪرڻ، ايف آءِ اي هيڊڪوارٽر بلڊنگ جي ايپ گريڊيشن ۽ ايف آءِ اي اڪيڊمي جي نئين الاٽ ٿيل زمين اداري جي حوالي ڪرڻ جي هدايت به جاري ڪئي. گهرو وزير منظور ٿيل خالي جاين تي فوري ڀرتي جو عمل شروع ڪرڻ جي هدايت ڏيندي چيو ته اسان سمورا ضروري وسيلا فراهم ڪنداسين پر ان سان گڏ توهان کي عملي ڪارڪردگي به ڏيکارڻي پوندي. ڊائريڪٽر جنرل ايف آءِ اي راجه رفعت مختار وفاقي وزير کي بريفنگ ۾ ٻڌايو ته ايف آءِ اي ايڪٽ ۾ ضروري ترميم تي ڪم ٿي چڪو آهي، اداري کي ڊگهي مدت کان اي آفيس تي منتقل ڪيو ويو آهي جڏهن ته ايف آءِ اي جا سمورا نوٽيس هاڻي ڪيو آر ڪوڊ سان جاري ڪيا ويندا. اجلاس ۾ ايف آءِ اي جا ايڊيشنل ڊائريڪٽر جنرلز، ڊائريڪٽرز ۽ زونل ڊائريڪٽرز (آن لائن ) شريڪ هئا .
