لاهور – 19 آگسٽ (اي پي پي)پاڪستان ڪرڪيٽ بورڊ سال 26-2025ع جي عالمي سيزن لاءِ 30 رانديگرن کي سينٽرل ڪانٽريڪٽ ڏئي ڇڏيا آهن. هن ڀيري رانديگرن کي ڪيٽيگري ”اي“ ۾ شامل ناهي ڪيو ويو جڏهن ته ڪيٽيگري ”بي، سي ۽ ڊي“ ۾ 10-10 رانديگرن کي رکيو ويو آهي. پي سي بي ترجمان موجب هن سال 12 نون رانديگرن کي ڪانٽريڪٽ ڏنا ويا آهن جن ۾ احمد دانيال، فهيم اشرف، حسن علي، حسن نواز، حسين طلعت، خوشدل شاهه، محمد عباس، محمد حارث، محمد نواز، صاهب زاده فرحان، سلمان مرزا ۽ صفيان مقيم شامل آهن. گذريل ڪارڪردگي جي بنياد تي 5 رانديگرن ابرار احمد، حارث رئوف، صائم ايوب، سلمان علي آغا ۽ شاداب خان کي ڪيٽيگري سي مان ترقي ڏئي بي ۾ شامل ڪيو ويو آهي. ٻئي پاسي 8 رانديگر عامر جمال، حسيب الله، ڪامران غلام، مير حمزه، محمد علي، محمد حريره، محمد عرفان خان ۽ عثمان خان هن ڀيري ڪانٽريڪٽ حاصل ڪرڻ ۾ ناڪام رهيا. ڪيٽيگري بي جي رانديگرن ۾ بابر اعظم، محمد رضوان، فخر زمان، شاهين شاهه آفريدي، حسن علي ۽ شاداب خان سميت 10 ڪرڪيٽرز شامل آهن. ڪيٽيگري سي ۾ نسيم شاهه، سعود شڪيل، محمد نواز، عبدالله شفيق ۽ ٻيا رانديگر جاءِ ٺاهڻ ۾ ڪامياب ٿيا جڏهن ته ڪيٽيگري ڊي ۾ شان مسعود، خوشدل شاهه، حسين طلعت ۽ ٻيا 10 رانديگر شامل آهن. اهي ڪانٽريڪٽس پهرين جولاءِ 2025 کان 30 جون 2026ع تائين ڏنا ويا آهن.
