گڏيل قومون – 19 آگسٽ (اي پي پي) پاڪستان گڏيل قومن جي سلامتي ڪائونسل ۾ ڏکڻ سوڊان جي بگڙجندڙ سياسي ۽ سلامتي واري صورت حال تي ڳڻتي جو اظهار ڪندي فوري طور تي جنگ بندي، سال 2018ع جي تجديد ٿيل امن معاهدي جي پاسداري ۽ سمورين ڌرين وچ ۾ ٻيهر ڳالهين جي بحالي تي زور ڀريو آهي. گڏيل قومن ۾ پاڪستان جي مستقل سفير عاصم افتخار احمد ڏکڻ سوڊان جي صورتحال تي سلامتي ڪائونسل جي اجلاس کي خطاب ڪندي چيو آهي، ته 2018ع جو تجديد ٿيل امن معاهدو ئي امن جو بنياد آهي ۽ ان جي ڀڃڪڙي موجوده بحران کي وڌيڪ گهرو ڪري سگهي ٿي. هن چيو ته ڏکڻ سوڊان ۾ سياسي ۽ سلامتي جو ماحول هن وقت پٺتي وڃي رهيو آهي، جڏهن ته ان کي اڳيان وڌڻ گهرجي. هن زور ڀريو ته سمورن سياسي قيدين کي فوري طور تي آزاد ڪيو وڃي، ڇاڪاڻ ته اعتماد ۽ شموليت ئي گهڻي وقت جي امن جي ڪنجي آهي. سفير عاصم افتخار چيو آهي، ته 2026ع جي آخر ۾ امڪاني چونڊون امن جو هڪ ڪرڻو آهي، پر شفاف ۽ اعتبار جوڳي چونڊن لاءِ عالمي سهڪار سان گڏوگڏ مقامي سطح تي اعتماد جو ماحول پڻ ضروري آهي. هن ڏکڻ سوڊان ۾ انساني بحران کي ”سنگين“ قرار ڏيندي چيو آهي، ته هٿياربند تڪرار، موسمياتي تبديليون، ڊائريا جي وبا ۽ پاڙيسري ملڪ سوڊان جي صورتحال جي اثرن لکين ماڻهن کي خطري ۾ وجهي ڇڏيو آهي. پاڪستاني نمائندي گڏيل قومن جي امن مشن (يو اين ايم آءِ ايس ايس) کي ”زندگي جي ڏور“ قرار ڏيندي پاڪستاني امن فوجين جي خدمتن جي تعريف ڪئي. هن ٻڌايو ته پاڪستاني جٿا هن وقت تائين 80 ڪلوميٽر کان وڌيڪ حفاظتي بند تعمير ڪري چڪا آهن. جيڪي متاثر آبادين کي تحفظ فراهم ڪري رهيا آهن. پاڪستاني نمائندي چيو ته جيتوڻيڪ ڏکڻ سوڊان جو رستو ڏکيو آهي، پر ناممڪن ناهي. هن چيو ته جيڪڏهن قيادت سنجيده سياسي عزم جو مظاهرو ڪري، امن عمل کي قومي ملڪيت تحت اعتماد ۽ شموليت تي گامزن ڪيو وڃي، ۽ عالمي برادري پنهنجي حمايت جاري رکي ته ڏکڻ سوڊان ۾ امن، استحڪام ۽ خوشحالي جو خواب ساڀيان ماڻي سگهي ٿو.
