واشنگٽن _ 29 آگسٽ (اي پي پي) آمريڪا چيو آهي ته هو ايران سان سڌي ريت ڳالهيون ڪرڻ لاءِ تيار آهي ته جيئن ايٽمي پروگرام تي اختلافن کي پر امن طريقي سان حل ڪري سگهجي. پرڏيهي ميڊيا مطابق آمريڪي پرڏيهي وزير مارڪو روبيو چيو ته آمريڪا اڃان به ايران سان سڌي ريت ڳالهين لاءِ دستياب آهي ته جيئن ايران جي ايٽمي معاملي تي پرامن ۽ پائيدار حل ڳولي سگهجي. هن واضح ڪيو ته فرانس، جرمني ۽ برطانيه طرفان ايران تي ٻيهر پابنديون لاڳو ڪرڻ جي عمل جي شروعات باوجود آمريڪا سفارتڪاري کان پوئتي ناهي هٽيو. هن چيو ته اهو قدم اسانجي مخلصاڻي سفارتي ڪوششن جي نفي نٿو ڪري، پر ان کي وڌيڪ هٿي ڏي ٿو. هن چيو ته مان ايراني قيادت کان مطالبو ڪيان ٿو ته هو فوري قدم کڻي ته جيئن ايران ڪڏهن به ايٽمي هٿيار حاصل نه ڪري سگهي، امن جو رستو اختيار ڪري، ۽ ايراني عوام لاءِ خوشحالي جو رستو هموار ڪري.
