ابوظھبي – 22 آگسٽ (اي پي پي) گڏيل عرب امارات غزه لاءِ امداد جو 77 ھون ايئر ڊراپ آپريشن مڪمل ڪري ورتو آھي. پرڏيھي ميڊيا مطابق اھا ڪارروائي اردن جي شراڪت سان انجام ڏني وئي جڏھن ته جرمني، فرانس، ھالينڊ، سنگاپور، انڊونيشيا به ان مشن ۾ شامل ھئا. امارات طرفان موڪليل امدادي کيپ ۾ بنيادي غذائي شيون شامل ھيون جنھن کي اماراتي فلاحي ادارن جي سھڪار سان تيار ڪيو ويو ھو. امدادي شين جو مقصد غزه جي عوام جي ضرورتن کي پورو ڪرڻ آھي جيڪي هن وقت سخت بحران کي منھن ڏئي رھيا آھن. امارات جي ان ھوائي ڪارروائي ذريعي ھيستائين مجموعي طور 4 ھزار 28 ٽن کان وڌيڪ امدادي سامان فضائي رستي ذريعي غزه پھچايو ويو آھي جنھن ۾ خوراڪ ۽ ضرورت جون ٻيون شيون شامل آھن.
