لاهور- 03 آگسٽ (اي پي پي) پاڪستان ڪرڪيٽ بورڊ ورلڊ چيمپيئن شپ آف ليجنڊرز ۾ مستقبل ۾ ڪنهن به قسم جي شرڪت تي مڪمل پابندي لڳائي ڇڏي آهي. اهو فيصلو پي سي بي جي 79 هين بورڊ آف گورنرز اجلاس ۾ ڪيو ويو جيڪو چيئرمين محسن نقوي جي صدارت هيٺ ورچوئلي منعقد ٿيو. پي سي بي پنهنجي پڌرائي ۾ ڊبليو سي ايل جي ان عمل تي سخت مايوسي جو اظهار ڪيو جنهن ۾ ڄاڻي واڻي ميچ نه کيڏڻ واري ٽيم کي پوائنٽس ڏنا ويا ۽ پاڪستان ۽ ڀارت وچ ۾ مقابلي وارين ليجنڊز ميچز کي رد ڪرڻ جو اعلان اهڙن لفظن ۾ ڪيو ويو جيڪي منافقت تي ٻڌل هئا. پڌرائي ۾ چيو ويو ته راند جي ميدان کي سياسي مقصدن ۽ واپاري مفادن جي تابع ڪرڻ مذمت جوڳو آهي. ”راند ذريعي امن“ جو نعرو رڳو مخصوص موقعن تي استعمال ڪيو ويندو آهي، جڏهن ته حقيقت ۾ راند کي سياسي طور استعمال ڪيو پيو وڃي. پي سي بي واضح ڪيو ته هو راند ۽ سياست کي ڌار رکڻ جو اصولي موقف رکي ٿو ۽ هميشا ان ڳالهه جو حامي رهيو آهي ته ڪرڪيٽ خير سگالي، احترام ۽ صحتمند مقابلي جو ذريعو هجڻ گهرجي. پڌرائي مطابق ليجنڊز تي ٻڌل ٽورنامينٽ کي سياسي جّبن جي اثر هيٺ هلائڻ انتهائي افسوسناڪ ۽ راند جي روح جي ابتڙ آهي. پي سي بي ڊبليو سي ايل طرفان ڏنل ”معذرت“ کي ڏيکاءُ قرار ڏيندي چيو ته ان اعتراف مان واضح ٿئي ٿو ته ميچ کي رد ڪرڻ جو فيصلو ڪرڪيٽ جي بنياد تي نه پر مخصوص قومي بيانيي کي خوش ڪرڻ لاءِ ڪيو ويو. ان صورتحال کي نظر ۾ رکندي پي سي بي سخت موقف اختيار ڪندي ڊبليو سي ايل سان ٻيهر ڪنهن به قسم جي شرڪت کي رد ڪيو آهي. پي سي بي جو چوڻ آهي ته هو اهڙي ڪنهن به ايونٽ جو حصو نه بڻجندو جتي اڻ ڌري، منصفاڻي راند ۽ ان جي اصل روح کي سياسي دٻاءُ تحت پامال ڪيو وڃي. اجلاس ۾ سمير احمد سيد، سلمان نصير سميت ٻيا شريڪ ٿيا.
