فلوريڊا-01 آگسٽ (اي پي پي) پاڪستان ۽ ويسٽ انڊيز جي ڪرڪيٽ ٽيمن وچ ۾ ٽن ٽي – ٽوئنٽي عالمي ميچن تي ٻڌل سيريز جي ٻي ميچ سڀاڻي 3 آگسٽ تي سينٽرل بروورڊ ريجنل پارڪ اسٽيڊيم ٽرف گرائونڊ، لاڊر هل، فلوريڊا ۾ کيڏي ويندي. اها ميچ رات جو فلڊ لائيٽ جي روشني ۾ کيڏي ويندي. پاڪستان کي ٽن ٽي – ٽوئنٽي ميچن جي سيريز ۾ ويسٽ انڊيز خلاف 1-0 جي برتري حاصل آهي. گرين شرٽس پهرين ٽي – ٽوئنٽي ميچ ۾ ميزبان ويسٽ انڊين ٽيم کي 14 رنسن تان شڪست ڏني هئي. پاڪستان جي ڪرڪيٽ ٽيم هن وقت ويسٽ انڊيز جي دوري تي آهي ۽ گرين شرٽس پنهنجي ويسٽ انڊيز جي دوري دوران ميزبان ٽيم خلاف 3 ٽي – ٽوئنٽي ۽ 3 ون ڊي عالمي ميچن جي سيريز کيڏندي. ٽن ٽي – ٽوئنٽي عالمي ميچن جي سيريز جي هڪ ميچ کيڏي وئي آهي جيڪا پاڪستان کٽي ورتي آهي. ويسٽ انڊيز ٽيم خلاف 3 ٽي – ٽوئنٽي عالمي ميچن جي سيريز ۾ پاڪستاني ٽيم کي مشهور آل رائونڊر سلمان آغا ليڊ ڪري رهيو آهي جڏهن ته ميزبان ويسٽ انڊيز جي ٽيم کي شائي هوپ ليڊ ڪري رهيو آهي. ٻنهي ٽيمن وچ ۾ ٽن ٽي – ٽوئنٽي ميچن جي سيريز جي ٻي ميچ 3 آگسٽ جڏهن ته ٽئين ۽ آخري ميچ 4 آگسٽ تي کيڏي ويندي.
