جميڪا – 31 جولاءِ(اي پي پي) پاڪستان ۽ ويسٽ انڊيز جي ڪرڪيٽ ٽيمن وچ ۾ 3 ٽي-20 عالمي ميچن تي ٻڌل سيريز جو پھريون ميچ پهرين آگسٽ تي کيڏيو ويندو. اھو ميچ رات جو، فلڊ لائيٽس جي روشني ۾ کيڏيو ويندو. پاڪستان جي ڪرڪيٽ ٽيم ھن وقت ويسٽ انڊيز جي دوري تي آھي ۽ گرين شرٽس پنھنجي دوري دوران ميزبان ٽيم خلاف 3 ٽي-20 ۽ 3 ھڪ ڏينھن وارا عالمي ميچ کيڏندي. قومي ڪرڪيٽ ٽيم ويسٽ انڊيز خلاف پھرين ٽي-20 انٽرنيشنل ميچ کان اڳ ڀرپور پريڪٽس ڪئي. سيشن دوران رانديگرن بيٽنگ، بالنگ ۽ فيلڊنگ جون مختلف مشقون ڪيون جڏهن ته ڪوچنگ اسٽاف ڪنڊيشنز کي نظر ۾ رکندي نيٽ پريڪٽس ۾ رانديگرن کي مخصوص هدف ڏنا ته جيئن هو ميچ جي صورتحال سان هم آهنگ ٿي سگهن. بيٽسمينن خاص طور تي پاور هٽنگ تي ڌيان رکيو ۽ مختلف رخن ۾ شاٽس کيڏڻ جي مشق ڪئي ته جيئن حريف بالرن خلاف جارحاڻي حڪمت عملي اختيار ڪري سگهن. ٻنھي ٽيمن وچ ۾ ٽي-20 سيريز لاءِ ڪرڪيٽ جا مداح بي چيني سان منتظر آھن. ويسٽ انڊيز خلاف 3 ٽي-20 عالمي ميچن جي سيريز ۾ پاڪستان جي ڪرڪيٽ ٽيم جي قيادت بھترين آل رائونڊر سلمان علي آغا ڪندو. ٻنھي ٽيمن وچ ۾ 3 ٽي-20 ميچن جي سيريز جو ٻيو ميچ 3 آگسٽ جڏھن ته ٽيون ۽ آخري ميچ 4 آگسٽ تي کيڏيو ويندو. 3 ٽي-20 عالمي ميچن تي ٻڌل سيريز جا ٽئي ميچ فلڊ لائٽس جي روشني ۾ کيڏيا ويندا. ٽي-20 سيريز مڪمل ٿيڻ بعد 3 ھڪ ڏينھن وارين ميچن جي سيريز جو پھريون ميچ 8 آگسٽ تي کيڏيو ويندو، ون ڊي سيريز جو ٻيو ميچ 10 آگسٽ تي کيڏيو ويندو جڏھن ته ٽيون ۽ آخري ون ڊي ميچ 12 آگسٽ تي کيڏيو ويندو. ون ڊي سيريز ۾ پاڪستان جي قيادت بهترين وڪيٽ ڪيپر ۽ بيٽسمين محمد رضوان ڪندو.
