پيرس-29 نومبر (اي پي پي) نيشنل ڊيٽابيس اينڊ رجسٽريشن اٿارٽي (نادرا) جي چيئرمين ليفٽيننٽ جنرل محمد منير چيو آهي ته ڪيترائي ملڪ ڊجيٽل تبديلي جي سفر ۾ نادرا جي خدمتن مان فائدو کنيو آهي، نادرا جا ڪلائنٽس اعتماد ۽ سکڻ سان گڏ ٽيڪنالاجي جي مڪمل منتقلي سان ڪسٽمائزڊ سلوشن استعمال ڪرڻ جي قابل آهن، فرانس ۾ پاڪستان جي سفارتخاني مان جاري بيان موجب اهڙن خيالن جو اظهار هن پيرس ۾ ٽن ڏينهن واري ٽرسٽيڪ 2023ع نمائش کي خطاب ڪندي ڪيو، جنهن ۾ هو پاڪستان جي نمائندگي ڪري رهيو آهي. نادرا چيئرمين ٽرسٽيڪ جي شرڪت ڪندڙن کي خطاب ۾ 2000ع ۾ نادرا جي قيام کان وٺي هن وقت تائين جي ان جي اڀرندڙ ڪردار جو ذڪر ڪندي اداري جي سمورين ڪاميابين سميت شناختي ڪارڊ (قومي شناختي ڪارڊ، اوورسيز ڪارڊ) سميت مالياتي نظام (موبائيل/برانچ ليس بئنڪنگ، ناڻي جي مٽاسٽا، پينشن جي ورڇ)، اي گورنس (آن لائن ويزا، ٽيڪسيشن سسٽم، اي پاسپورٽ، قانوني وراثت)، صحت ۽ تعليم (ويڪسينيشن سسٽم، اسڪالرشپ پروگرام) ۽ سماجي تحفظ (ڊزاسٽر رليف پروگرام، سبسڊي پروگرام) جي باري ۾ آگاهه ڪيو. فرانس ۾ پاڪستان جي سفير عاصم افتخار احمد ٽرسٽيڪ نمائش ۾ لڳايل نادرا جي پويلين جو دورو ڪيو جتي کيس نادرا چيئرمين نادرا طرفان شروع ڪيل ڊجيٽل تبديلي ۽ خدمتن جي باري ۾ بريفنگ ڏني، پاڪستان جي سفير نادرا جي ڪم کي شناخت ذريعي بااختيار بڻائڻ جو حوالو ڏيندي اداري جي متعارف ڪرايل نئين خدمتن خاص طور تي ان جي موبائيل ايپ سهولت جي واکاڻ ڪئي. سفير نمائش جو دورو ڪيو ۽ مختلف ملڪن جي مختلف نمائش ڪندڙن سان ڳالهه ٻولهه ڪئي. ٽرسٽيڪ نمائش ڊجيٽل ٽرسٽ ٽيڪنالاجيز جي صنعتن سان لاڳاپيل ماڻهن کي سالياني ملاقات جو موقعو فراهم ڪندي آهي جيڪا سڄي دنيا مان ايندڙن کي متوجهه ڪري ٿي.
