اسلام آباد – پهرين جولاءِ (اي پي پي) وزيراعظم عمران خان چيو آهي ته پاڪستان چين سان سياسي، اقتصادي ۽ واپاري لاڳاپن کي مضبوط بڻائڻ جو خواهشمند آهي، سي پيڪ بيلٽ اينڊ روڊ قدم ۾ هڪ اهم منصوبو آهي، سي پيڪ منصوبن جو جائزو وٺڻ لاءِ هڪ اعليٰ سطح جي ڪميٽي قائم ڪئي آهي، آئنده چين جي دوري جو منتظر آهيان، پاڪستان ۽ چين جي ميڊيا جي وچ ۾ ويجهي تعاون جو خواهشمند آهيان، چين جي ڪميونسٽ پارٽي ۽ قيادت کي سئو سال جي تقريبن تي مبارڪباد ڏيان ٿو، وزيراعظم اهڙن خيالن جو اظهار چيني ميڊيا سان ڳالهائيندي ڪيو. هن چيو ته پاڪستان ۽ چين جي لاڳاپا انتهائي ويجها ۽ گهرا آهن، اسان جي ميڊيا ۽ ثقافتي لاڳاپا ايترا ويجها نه آهن جيترا اسان جا سياسي لاڳاپا آهن، وزيراعظم چيو ته چيني ميڊيا کان اڄ جي ملاقات جو مقصد ميڊيا رابطن کي فروغ ڏيڻ آهي، پاڪستان ۾ اسان صدر شي جن پنگ کي جديد دور جو هڪ وڏو سياستدان تصور ڪريون ٿا، پاڪستاني ٻن لحاظن کان ان کان متاثر آهي، هڪ ته ڪرپشن جي خلاف ان جي جنگ آهي، چيني صدر جي بدعنواني جي خاتمي جي مهم تمام گهڻي ڪامياب آهي ۽ پاڪستاني ان کان گهڻا متاثر آهن، وزيراعظم عمران خان چيو ته چين جو هڪ ٻيو ڪارنامو هڪ وڏي تعداد ۾ غريبن کي غربت مان ڪڍڻ آهي، چين 70 ڪروڙ ماڻهن کي غربت مان ڪڍيو آهي، تازو ئي چين اعلان ڪيو آهي ته هن ان حوالي سان انتهائي گهٽ وقت ۾ غير معمولي ڪاميابي حاصل ڪئي آهي، منهنجو خيال آهي ته ڪنهن به انساني معاشري ۾ اهڙو مثال نٿو ملي، هن چيو ته اسان سي پيڪ منصوبن جو جائزو وٺڻ لاءِ هڪ اعليٰ سطح جي ڪميٽي قائم ڪئي آهي، آئون ايندڙ هفتي گوادر وڃي رهيو آهيان، آئون اتان کان سي پيڪ منصوبن تي ڪم جي رفتار جو جائزو وٺندس، آئون اتي چيني ڪارڪنن سان ملاقات ڪندس، وزيراعظم عمران خان چين جي تجويز ڪيل دوري جو ذڪر ڪندي چيو ته آئون ايندڙ هڪ ٻن مهينن ۾ پنهنجي چين جي دوري جو منتظر آهيان، ان دوري ۾ پاڪستان ۽ چين جي وچ ۾ سياسي ۽ اقتصادي لاڳاپن کي فروغ ڏيڻ تي ڳالهه ڪندس، وزيراعظم عمران خان چيو ته ڪميونسٽ پارٽي آف چائنه (سي پي سي) هڪ منفرد ماڊل آهي، اسان کي هن وقت تائين اهو ٻڌايو ويو ته مغربي جمهوريت ڪنهن به معاشري جي ترقي جو بهترين نظام آهي پر سي پي سي هڪ اهڙو متبادل نظام ڏنو آهي جنهن سموري مغربي جمهوريتن کي مات ڏئي ڇڏي آهي، هن چيو ته جنهن معاشري ۾ حڪمران طبقي جو احتساب ٿئي ۽ ميرٽ هجي اهو ڪامياب ٿيندو آهي، هن وقت تائين اهو خيال هو ته جمهوريت جي ذريعي حڪمران ميرٽ تي چونڊجندا آهن پر پوءِ ان قيادت جو احتساب به ڪري سگهجي ٿو. سي پي سي چونڊون جمهوريت کانسواءِ سڀئي مقصد وڌيڪ بهتر طريقي سان حاصل ڪيا آهن، جڏهن مون چين ۾ ڪميونسٽ پارٽي جي هيڊڪوارٽر جو دورو ڪيو ته مون ڏٺو ته انهن جو ٽئلينٽ کي ڳولڻ ۽ پوءِ ان جي تربيت ڪرڻ جو نظام ڪنهن به چونڊيل جمهوريت کان بهتر آهي، جڏهن هو ڪا شيءَ تبديل ڪرڻ چاهيندا آهن ته اهو نظام ان جي حمايت ڪندو آهي، اسان جو معاشرو ۽ ايستائين جو مغربي جمهوريت ۾ ڪنهن نظام ۾ تبديلي تمام گهڻي مشڪل آهي، توهان سدائين اهو نٿا ڪري سگهو جيڪو معاشري لاءِ بهتر هجي، چين ان لاءِ ايتري تيزي سان ترقي ڪئي آهي ته هو پنهنجي نظام ۾ تيزي سان تبديلي آڻيندا آهن، جڏهن هو سمجهندا آهن ته ڪو نظام ڪم ناهي ڪري رهيو ته هو ان کي تبديل ڪري ڇڏيندا آهن ۽ انهن ڊگهي مدي واري منصوبابندي ڪئي آهي، چونڊ جمهوريت ۾ صرف پنجن سالن جي منصوبابندي ڪئي ويندي آهي، وزيراعظم چيو ته سي پيڪ جو اڳيون منصوبو پاڪستان جي لاءِ گهڻو حوصلي وارو آهي، اسان وٽ خصوصي اقتصادي زون هوندا، اسان کي اميد آهي ته چيني صنعت ان خصوصي زونز طرف متوجهه ٿي اسان ان کي مراعتون ڏينداسين، پاڪستان ۾ ليبر سستي آهي ۽ اميد آهي ته چين جا صنعتڪار ان طرف متوجهه ٿيندا. هن چيو ته اسان چين کان زراعت جي شعبي ۾ تعاون جا خواهشمند آهيون، پاڪستان بنيادي طور تي هڪ زرعي ملڪ آهي ۽ اسان پنهنجي زراعت وڌائڻ تي ڌيان ناهي ڏنو، اسان کي اميد آهي ته اسان چين جي جديد زرعي مهارتن مان فائدو حاصل ڪري سگهون ٿا، هن چيو ته صدر شي جن پنگ ۽ وزيراعظم لي ڪي چيانگ جنهن عمل جي ذريعي ان مقام تي پهتا آهن ان جي لاءِ انهن 30 سالن جي جدوجهد ڪئي، هنن ٻهراڙي جي سطح تي جدوجهد شروع ڪئي ۽ پنهنجي محنت سان اڳواڻ بڻيا آهن، ان قسم جو عمل ڪيترين ئي چونڊيل جمهوريتن ۾ اڻ لڀ آهي. آمريڪي صدر کي ان قسم جي سخت محنت ۽ جدوجهد کان ناهي گذرڻو پيو، چيني قيادت جڏهن اعليٰ مقام تي پهتي آهي ته ان کي ڀرپور تجربو حاصل ٿي چڪو هوندو آهي، هو نظام کي مڪمل طور تي سمجهن ٿا انهن کي خبر آهي ته هيٺين سطح تي ماڻهو ڪهڙي زندگي گذاري رهيا آهن، اهو ئي سبب آهي ته هو غربت جي خاتمي ۾ ڪامياب رهيا آهن. هن چيو ته جهڙي طرح چين ڪورونا وائرس وبا جو مقابلو ڪيو اهو منفرد هو. چين اسان جي جهڙي طرح مدد ڪئي ويڪسين عطيو ڪئي ان تي اسان چين جا ٿورائتا آهيون، چين کانپوءِ پاڪستان اهو ملڪ آهي جنهن بهتر انداز ۾ ڪورونا وائرس جي وبا جو مقابلو ڪيو. چين جي مدد سان اسان پنهنجي طبي عمل کي وقت سر ويڪسين لڳائڻ ۾ ڪامياب رهياسين، پاڪ چين دوستي جي باري ۾ هڪ سوال جي جواب ۾ وزيراعظم چيو ته پاڪستان ۽ چين جا لاڳاپا تمام خاص آهن، چين مشڪل وقت ۾ اسان جو ساٿ ڏنو، چين ۽ ان جي عوام جو پاڪستانين جي دلين ۾ خاص مقام آهي، هڪ ٻي سوال جي جواب ۾ هن چيو ته چين ۽ آمريڪا جي اختلافن سان پيچدگيون پيدا ٿيون آهن، پاڪستان سمجهي ٿو ته اها ڳالهه صحيح نه آهي ته آمريڪا ۽ ٻيون مغربي طاقتون پاڪستان جهڙي ملڪن کي ڪنهن هڪ گروپ جو ساٿ ڏيڻ تي مجبور ڪري اسان ڇو ڪنهن جي سائيڊ وٺون، اسان سڀني سان سٺا لاڳاپا چاهيون ٿا، پاڪستان چين سان سٺا لاڳاپا چاهي ٿو، پاڪستان چين سان پنهنجي لاڳاپن کي ڪڏهن گهٽ نه ڪندو، جيترو به دٻاءُ هجي اسان جا لاڳاپا تبديل نه ٿيندا، سي پيڪ سان اسان جو اقتصادي مستقبل ڳنڍيل آهي، وزيراعظم چيو ته چين هڪ اڀرجندڙ سپورٽنگ پاور آهي جڏهن ادارا مضبوط ٿيندا ته ان ملڪ جي راند کي به فروغ ملندو آهي، ڪورونا وائرس جي وبا جي حوالي سان هڪ سوال جي جواب ۾ وزيراعظم عمران خان چيو ته دنيا کي اڃان وبا درپيش آهي ۽ اسان ان تي ڪا حتمي راءِ قائم نٿا ڪري سگهون، وزيراعظم هڪ سوال جي جواب ۾ چيو ته سنڪ يانگ جي حوالي سان مغربي ميڊيا ۽ حڪومتن جي موقف ۽ چين جي موقف ۾ فرق آهي، اسان چيني موقف کي تسليم ڪريون ٿا. ان حوالي سان مغربي ميڊيا جو ڪشمير کي تمام گهٽ ڪوريج ڏيڻ منافقاڻو رويو آهي، هن چيو ته سي پيڪ جو پهريون مرحلو توانائي ۽ رابطا هيو، اسان هاڻي زرعي شعبي ۾ چين کان فائدو حاصل ڪرڻ چاهيون ٿا، هنرمندي جي حوالي سان تعاون جا خواهشمند آهيون، هڪ سوال تي وزيراعظم چيو ته چين ۽ آمريڪا جي مخالفت تمام ڳڻتي جوڳي آهي ان سان دنيا هڪ ڀيرو ٻيهر ٻن حصن ۾ ورهائجي ويندي. اسان ڇو ڪنهن جو پاسو وٺون، چين سان اسان جا 70 سال پراڻا لاڳاپا آهن، آمريڪا جي سڀ کان وڏي غلطي آهي اها آهي ته ان عسڪري قوت سان مسئلو حل ڪرڻ جي ڪوشش ڪئي، افغانستان جي تاريخ آهي ته ڪو به افغانين کي تابع نه ڪري سگهيو، جيئن آمريڪا افغانستان مان نڪرڻ جو اعلان ڪيو، طالبان ان کي پنهنجي فتح قرار ڏنو اهڙي صورتحال ۾ انهن کي سياسي حل تي آڻڻ گهڻو مشڪل آهي، جيڪڏهن افغانستان ۾ گهرو ويڙهه ٿئي ٿي ته ان سان سڀ کان وڌيڪ متاثر پاڪستان ٿيندو، ان لاءِ اسان هر صورت ۾ سياسي حل چاهيون ٿا، وزيراعظم عمران خان جي چيني ميڊيا سان ڳالهه ٻولهه جي موقعي تي اطلاعات ۽ نشريات وارو وفاقي وزير چوڌري فواد حسين، منصوبابندي، ترقي ۽ سڌارن وارو وفاقي وزير اسد عمر به موجود هو.
