اسلام آباد – 29 آڪٽوبر (اي پي پي) اقتصادي رابطا ڪميٽي (اي سي سي) ربيع جي فصل لاءِ وزيراعظم جي پيڪيج جي منظوري ڏئي ڇڏي آهي، پيڪيج تحت ڀاڻ جنهن ۾ ڊي اي پي، فاسفيٽ ۽ پوٽاشيم شامل آهن، جي هر 50 ڪلوگرام ٻوري تي 1000 روپين جي سبسڊي فراهم ڪئي ويندي، وفاقي ۽ صوبائي حڪومتون 70 ۽ 30 سيڪڙو جي حصيداري جي بنياد تي سبسڊي ڏينديون، جڙي ٻوٽين جي خاتمي وارن ڪيميڪلز جي مد ۾ في ايڪڙ 250 روپيا ۽ جيت مار دوائن جي مد ۾ 150 روپين جي سبسڊي فراهم ڪئي ويندي. اقتصادي رابطا ڪميٽي جو خصوصي اجلاس هتي وزيراعظم جي ناڻي ۽ روينيو بابت صلاحڪار ڊاڪٽر عبدالحفيظ شيخ جي صدارت ۾ منعقد ٿيو.
