اسلام آباد – 24 ڊسمبر (اي پي پي) پاڪستان، چين، روس، ترڪيءَ، ايران ۽ افغانستان علائقائي سلامتي، خودمختياري ۽ آزادي جي تحفظ جي عزم کي ورجائيندي چيو آهي ته دهشتگردي جو تعلق ڪنهن به مذهب، قوميت، تهذيب، ثقافت يا نسلي گروپ سان نه ڳنڍڻ گهرجي، دهشتگردي اسان جي ملڪن سميت پوري دنيا جي لاءِ گڏيل خطرو آهي، اسان ان جي ڪنهن به قسم جي مذمت ڪريون ٿا، اسان جي حڪومتن کي گهرجي ته اهي دهشتگردي جي خاتمي لاءِ ٺوس حڪمت عملي ۽ گڏيل قدمن ذريعي عملي ۽ ٺوس قدم کڻن، پاڪستان ۽ ڀارت گڏيل قومن جي سلامتي ڪائونسل جي قراردادن جي روشني ۾ عالمي ۽ علائقائي امن کي يقيني بڻائڻ جي لاءِ ڄمون ۽ ڪشمير جي تڪرار جو پرامن حل ڪڍن، دهشتگردي جي نظرين جي پکيڙ ۽ پروپئگنڊه جي روڪٿام جو موثر تعاون ضروري آهي. اسلام آباد ۾ منعقد ٿيندڙ پهرين اسپيڪرز ڪانفرنس جي پڄاڻي تي جاري ڪيل 29 نقاطي گڏيل پڌرنامي ۾ چيو ويو آهي ته اسان بيلٽ ۽ روڊ جي منصوبي جي سپورٽ ۽ ان جي آجيان ڪريون ٿا ۽ عالمي تعاون جي لاءِ مئي 2017ع ۾ چين ۾ منعقد ٿيندڙ بيلٽ ۽ روڊ فورم جي ڪاميابي کي ساراهيون ٿا.
