اسلام آباد – 28 نومبر (اي پي پي) ڊي ايٽ ملڪن جي سول ايوي ايشن جي ڊائريڪٽر جنرلز ۽ ايڪسپرٽ ورڪنگ گروپ جو ٻن ڏينهن وارو 11 هون اجلاس پڄاڻي تي پهتو. اجلاس جي ميزباني پاڪستان سول ايوي ايشن اٿارٽي ڪئي. ڊي ايٽ اهم اسرندڙ ملڪن بنگلاديش، مصر، انڊونيشيا، ايران، ملائيشيا، نائجيريا، پاڪستان ۽ ترڪيءَ جي وچ ۾ گڏيل تعاون جي تنظيم آهي جنهن جو مقصد ميمبر ملڪن جي عالمي معيشت ۾ پوزيشن بهتر بڻائڻ سان گڏوگڏ واپاري لاڳاپن ۾ نوان موقعا پيدا ڪري پنهنجي عوام جي زندگي جو معيار بلند ڪرڻ آهي. ڪانفرنس جي ٻئي ڏينهن ڪمرشل معاملن واري ٽاسڪ فورس جي انڊونيشيا سان تعلق رکندڙ چيئرمين ۽ ترڪيءَ سان تعلق رکندڙ ڊپٽي چيئرمين ڪمرشل معاملن تي روشني وڌي. ايوي ايشن ٽيڪنيڪل سروسز اٽسٽيم جي مارڪيٽنگ مئنيجر للڪر دريان فني معاملن تي بريفنگ ڏني.
