اسلام آباد – 04 آگسٽ (اي پي پي) صدر ڊاڪٽر عارف علوي چيو آهي ته پوليس جي شهيدن جي ڏهاڙي تي پوليس آفيسرن ۽ اهلڪارن پاران ڏنل لازوال قربانين تي انهن کي خراج عقيدت پيش ڪريون ٿا، مشڪل حالتن ۽ محدود وسيلن جي باوجود پوليس امن قائم ڪرڻ ۽ عوام جي حفاظت جي لاءِ مثالي ڪردار ادا ڪيو ۽ ان ڏس ۾ ڪنهن به قرباني کان نه ڪيٻايو. پوليس جي شهيدن جي ڏهاڙي جي موقعي تي پنهنجي جاري پيغام ۾ صدر چيو ته پوري قوم ملڪ ۽ قوم جي سلامتي لاءِ پنهنجي جانين جا نذرانا پيش ڪندڙن جي قرضي آهي، اڄ ان عزم جي ورجاءُ جو به ڏينهن آهي ته اسان کي متحد ٿي سمورين داخلي ۽ ٻاهرئين سازشن جو مقابلو ڪرڻو آهي ڇو ته شرپسند عنصر پاڪستان جي ترقي ۽ استحڪام جا مخالف آهن.
