اسلام آباد – 18 فيبروري (اي پي پي) وزيراعظم عمران خان چيو آهي ته پاڪستان جي مخصوص جاگرافيائي ۽ اسٽريٽجڪ بيهڪ ۽ سعودي عرب جي خصوصي اهميت هڪ اهڙو ڳانڍاپو آهي جيڪو اسان جي مستقبل لاءِ تمام اهم آهي، ولي عهد شهزاده محمد بن سلمان جي پاڪستان جي دوري سان تمام گهڻي خوشي ٿي آهي، سعودي عرب جي جيلن ۾ قيد 2107 پاڪستانين جي آزادي جي اعلان تي ولي عهد جا خصوص ٿورا مڃان ٿو جڏهن ته سعودي ولي عهد شهزاده محمد بن سلمان چيو آهي ته پاڪستان ۾ هو پنهنجي گهر وانگر محسوس ڪري رهيو آهي، سعودي عرب پاڪستان جي مستقبل تي يقين رکي ٿو، پاڪستان وٽ وسيع تر موقعا ۽ صلاحيت موجود آهي، 2030ع ۾ پاڪستان چين ۽ ڀارت کانپوءِ ٽئين وڏي معيشت هوندي، ترقي جي سفر ۾ پاڪستان سان گڏ هونداسين. اهڙن خيالن جو اظهار سعودي ولي عهد پاڪستان جي دوري جي پڄاڻي تي وزيراعظم عمران خان سان گڏ ميڊيا سان گڏيل ڳالهائيندي ڪيو.
