اسلام آباد – 21 سيپٽمبر (اي پي پي) قومي اسيمبلي جي اسپيڪر اسد قيصر چيو آهي ته اسان اسوه شبيري تي عمل ڪندي گڏيل اختلافن، تنگ نظري ۽ فرقيواريت کي وساري اتحاد ۽ ڀائيچاري جي فروغ ذريعي پنهنجي سمورين مشڪلاتن تي ضابطو آڻي سگهون ٿا، حضرت امام حسين رضه ۽ سندس ساٿي قرآني تعليم، برداشت، قرباني ۽ شهادت جي جذبي جو هڪ لازوال مثال آهن. قومي اسيمبلي جي اسپيڪر اسد قيصر عاشور واري ڏهاڙي جي موقعي تي قوم جي نالي پنهنجي پيغام ۾ چيو ته ڪربلا واقعو الله تعاليٰ ۽ آخرت جي ڏهاڙي تي پڪي ايمان، بي مثال تقويٰ، بهادري، الله جي راهه ۾ صبر ۽ قرآن مجيد جي بيان شهادت جي جذبي جو هڪ بهترين نمونو آهي جيڪو قيامت تائين ياد رکيو ويندو.
