اسلام آباد – 04 آگسٽ (اي پي پي) اطلاعات، نشريات، قومي تاريخ ۽ ادبي ورثي واري وفاقي وزير بئريسٽر سيد علي ظفر گلگت بلتستان جي ضلعي ديامر ۽ چيلاس ۾ اسڪولن کي ساڙڻ جي واقعي جي سخت مذمت ڪئي ۽ ان عزم جو اظهار ڪيو ته واقعي ۾ ملوث عنصرن کي انصاف جي ڪٽهڙي ۾ ضرور آندو ويندو. صحافين سان ڳالهائيندي هن چيو ته نگران وزيراعظم پاڪستان، وفاقي حڪومت، ڪابينا ۽ پنهنجي پاران ديامر ۽ چيلاس ۾ ٻارڙين جي اسڪولن کي ساڙڻ جي واقعن جي سخت مذمت ڪريان ٿو. هن چيو ته اهو هڪ انتهائي افسوسناڪ واقعو آهي ۽ ان ۾ ملوث عنصرن کي قانون جي پڪڙ ۾ ضرور آندو ويندو ۽ قانون اهو ڏوهه ڪندڙن کي سزا ڏيندو.