اسلام آباد – 12 جولاءِ (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته 256 صفحن تي ٻڌل جي آءِ ٽي رپورٽ پاڻ ان ڳالهه جي تصديق ڪري ڇڏي آهي ته نواز شريف جي پنجن حڪومتي دورن ۾ رياست جي هڪ پئسي جي ڪرپشن، گهپلو ۽ ڪميشن نه ورتي وئي. هو پريس انفارميشن ڊپارٽمينٽ ۾ ايم اين اي دانيال عزيز سان گڏ پريس ڪانفرنس کي خطاب ڪري رهي هئي. مملڪتي وزير مريم اورنگزيب چيو ته جي آءِ ٽي رپورٽ اچڻ کانپوءِ اهو گوڙ ٿي رهيو آهي ته وزيراعظم استعيفيٰ ڏي ۽ اهو تاثر ڏيڻ جي ڪوشش ڪئي پئي وڃي ته شايد اهو عوام جو آواز ۽ خواهش آهي، حقيقت ته اها آهي ته هن ملڪ جي عوام نواز شريف سان گڏ آهي ۽ محمد نواز شريف به عوام جو آواز آهي، الله تعاليٰ جي فضل ۽ ڪرم ۽ عوام جي ڪري وزيراعظم محمد نواز شريف ٽيون ڀيرو وزيراعظم چونڊيو آهي.
