اسلام آباد – 14 اپريل (اي پي پي) وزيراعظم محمد نواز شريف چيو آهي ته چين جي صدر شي جن پنگ جو ايشيا، آفريقا ۽ يورپ سميت پوري دنيا جي ملڪن کي ڳنڍڻ جو ويزن ساراهه جوڳو آهي، ترقي جي لاءِ اسان کي هڪ ٻئي جي ويجهو اچڻ گهرجي، هن وقت نظرياتي اختلافن کي هوا ڏيڻ جو وقت نه آهي، صدر شي جن پنگ جي اسٽريٽجڪ پارٽنرشپ ۽ هڪ خطو هڪ رستي جو ويزن قابل قدر آهي. اهڙن خيالن هن چيني صدر جي ڪتاب جي مهورتي تقريب کي خطاب ڪندي ڪيو. وزيراعظم محمد نواز شريف چيو ته ڪتاب جي مهورتي تقريب ۾ شرڪت منهنجي لاءِ اعزاز جي ڳالهه آهي. هن چيو ته صدر شي جن پنگ چين جو عظيم اڳواڻ ۽ پاڪستان جو دوست آهي.
