اسلام آباد – 05 آڪٽوبر (اي پي پي) پاڪستان ۽ بيلاروس هوابازي، تعليم، ڪسٽمز ۽ بيئنڪاري سميت مختلف شعبن ۾ تعاون جي 18 معاهدن تي صحيحون ڪيون آهن. وزيراعظم محمد نواز شريف ۽ بيلاروس جي صدر اليگزينڊر لوڪا شنڪو وزيراعظم هائوس ۾ گڏيل بيان تي صحيحون ڪيون ۽ معاهدن تي صحيحن جي تقريب ۾ شرڪت ڪئي. ٻئي ملڪ ڪسٽمز معاملي جي باري ۾، سول ۽ ڪمرشل معاملن ۾ قانوني مدد جي باري ۾ ۽ دوستي ۽ تعاون جي معاهدي جي توثيق جي مٽاسٽا دستاويزن تي صحيحون ڪيون، وزيراعظم جي پرڏيهي معاملن واري خاص صلاحڪار طارق فاطمي ۽ بيلاروس جي پرڏيهي وزير ولادي مير ميڪائي ٽنهي دستاويزن تي صحيحون ڪيون، اسٽيٽ بئنڪ آف پاڪستان ۽ نيشنل بئنڪ آف بيلاروس جي وچ ۾ ايم او يو تي اسٽيٽ بئنڪ جي گورنر سعيد احمد ۽ بيلاروس جي نيشنل بئنڪ جي بورڊ جي چيئرمين ممانو وچ پيٽر صحيحون ڪيون.
