اسلام آباد – 05 آڪٽوبر (اي پي پي) پاڪستان ۽ بيلاروس ننڍي صنعت، فارميسي، ڀاڄين جي مصنوعات، ٻيلن جي شعبن ۾ گڏيل منصوبا شروع ڪرڻ سان گڏوگڏ ٻنهي ملڪن جي وچ ۾ ننڍن ۽ وچين ماپي جي ڪاروبار ۾ سڌن رابطن کي فعال بڻائڻ ۾ گهري دلچسپي جو اظهار ڪيو آهي. بيلاروس جي صدر اليگزينڊر لوڪا شنڪو ۽ وزيراعظم محمد نواز شريف جي وچ ۾ ڳالهين جي پڄاڻي تي جاري گڏيل پڌرنامي ۾ ٻطرفن لاڳاپن ۾ تعميري اڳڀرائي کي نوٽ ڪندي بيلاروس ۽ پاڪستان جي گڏيل مفاد ۾ انهن رابطن کي سگهه ڏيڻ تي زور ڏنو ويو. ڳالهين ۾ ٻنهي طرفن کان ٻنهي ملڪن جي وچ ۾ سياسي ڳالهين کي وڌيڪ اڳيان وڌائڻ، بين الپارلياماني لاڳاپن،واپاري ۽ اقتصادي رابطن کي سگهه ڏيڻ ۽ ٻطرفي تعاون جي لاءِ قانوني ڍانچي کي سگهه ڏيڻ تي زور ڏنو. بيلاروس جي صدر نيوڪليئر سپلائرز گروپ گائيڊ لائينز ۽ ڪنٽرول فهرستن جي پاڪستان پاران پيروي، ائٽمي عدم پکيڙ سان لاڳاپيل، ائٽمي تحفظ ۽ سلامتي ۽ نيوڪليئر سپلائر گروپ، ڪنٽرول فهرستن بابت سپلاءِ ائٽمز جي حوالي سان پاڪستان جي سگهه کي ساراهيو.
