ڪراچي – 08 سيپٽمبر (اي پي پي) وزيراعظم محمد نواز شريف چيو آهي ته پوري ڪوشش ڪري رهيا آهيون ته پاڪستان ترقي جون منزلون ماڻيندو رهي، ڪراچي کان پشاور تائين موٽر وي ٺاهيو ويندو، بلوچستان جي چپي چپي ۾ رستا ٺهي رهيا آهن، بجلي ۽ گئس جي کوٽ ختم ڪئي ويندي، حڪومتي قدمن سبب ڪاروباري سرگرمين ۾ اضافو ٿيو آهي، برآمدات ۾ اضافي لاءِ مختلف تجويزن جو جائزو وٺي رهيا آهيون، ڪراچي اسٽاڪ ايڪسچينج جو 100 انڊيڪس 40 هزار جي بلند ترين سطح تي آهي، اسٽاڪ ايڪسچينج جي بهترين ڪارڪردگي جي حامل ڪمپنين کي ايوارڊ ڏيڻ جي تقريب کي خطاب ڪندي هن چيو ته ترقي جو نئون باب کلي رهيو آهي، 2018ع تائين بجلي جي لوڊشيڊنگ ختم ٿي ويندي، بجلي پيدا ڪرڻ لاءِ نه رڳو سڄي ملڪ ۾ ڪارخانا لڳايا پيا وڃن پر بجلي سستي به ڪري رهيا آهيون، پي آءِ اي، ريلوي سميت ٻين ادارن کي بهتر بڻائي رهيا آهيون.
