اسلام آباد – 11 آگسٽ (اي پي پي) اطلاعات، نشريات ۽ قومي ورثي واري وفاقي وزير سينيٽر پرويز رشيد چيو آهي ته اسان کي ڪنٽينر بدران جنريٽر جي فلسفي ۽ حڪمت عملي واري سياست جي ضرورت آهي ته جيئن ايندڙ نسلن لاءِ ترقي، خوشحالي ۽ روشني جي سفر کي يقيني بڻائي سگهجي. اهڙن خيالن جو اظهار هن ڪالهه خميس ڏينهن ويزن 2025ع جي حوالي سان مختلف شعبن ۾ نمايان ڪارڪردگي جو مظاهرو ڪندڙن لاءِ ايوارڊ ورهائڻ جي تقريب ”رائزنگ پاڪستان ويزن 2025“ کي خاص مهمان جي حيثيت سان خطاب ڪندي ڪيو. هن چيو ته پاڪستان کي ڪنٽينر جي سياست جي ضرورت نه آهي جيڪا قوم کي ترقي ۽ خوشحالي جي سفر کان روڪي ٿي، اطلاعات ۽ نشريات واري وفاقي وزير پرويز رشيد ۽ منصوبابندي جي وفاقي وزير احسن اقبال ويزن 2025ع لاءِ ڊجيٽل مهم جو افتتاح ڪيو.
