اسلام آباد-30 آگسٽ (اي پي پي)گهرو معاملن واري وفاقي وزير محسن نقوي چيو آهي ته سعودي عرب جي حڪومت ۽ سعودي سفير نواف بن سعيد احمد المالڪي پاڪستان ۽ هندستان جي هاڻوڪي ڇڪتاڻ دوران مخلصاڻو، ڀائراڻو ۽ موثر ڪردار ادا ڪيو، سعودي عرب جنگ ۽ امن ۾ هميشه پاڪستان سان گڏ بيٺل آهي. گهرو وزارت موجب وفاقي وزير محسن نقوي اسلام آباد ۾ ڊپلوميٽڪ انڪليو ۾ سعودي عرب جي سفارتخاني جو دورو ڪيو، سندس آمد تي سعودي سفير نواف بن سعيد احمد المالڪي وفاقي وزير جو شاندار آڌرڀاءُ ڪيو. ملاقات دوران وفاقي وزير محسن نقوي هاڻوڪي پاڪ ڀارت ڇڪتاڻ ۾ سعودي عرب جي حڪومت ۽ سفير جي مخلصاڻي ۽ ڀائراڻي ڪردار ادا ڪرڻ تي ٿورن جو اظهار ڪيو. هن چيو ته سعودي عرب هميشه پاڪستان سان گڏ بيٺل آهي، توڙي جنگ هجي يا امن. سعودي عرب هميشه ٻطرفن لاڳاپن تحت هر آزمائش ۾ پاڪستان سان گڏ آهي. محسن نقوي سعودي سفير کي پرڏيهه خاص ڪري سعودي عرب ۾ خيرات گهرڻ ۾ ملوث منظم گروهن خلاف پاڪستان جي جاري ڪريڪ ڊائون بابت پڻ آگاهه ڪيو. هن ان ڳالهه جي تصديق ڪئي ته پاڪستان جي سڃاڻپ ۽ مملڪت ۾ ڪم ڪندڙ شهرين جي تحفظ لاءِ خيرات گهرندڙ معافيا خلاف زيرو ٽالرينس جي پاليسي اختيار ڪئي آهي. سعودي سفير نواف بن سعيد احمد المالڪي گهرو وزير جي ڪوششن کي ساراهيندي چيو ته سعودي عرب پاڪستان کي هڪ ڀاءُ ۽ دوست ملڪ سمجهي ٿو. هن ان ڳالهه تي زور ڀريو ته رياض اسلام آباد سان پنهنجن لاڳاپن کي سڀ کان وڌيڪ اهميت ڏي ٿو ۽ ڪيترن ئي شعبن ۾ تعاون کي مضبوط بڻائڻ جو خواهشمند آهي.
