اسلام آباد-29 آگسٽ (اي پي پي) سامونڊي معاملن واري وفاقي وزير محمد جنيد انوار چوڌري چيو آهي ته گڏاڻي شپ بريڪنگ يارڊ دنيا جو ٽيون سڀ کان وڏو بريڪنگ يارڊ جو درجو رکي ٿو، ان کي پائيداري ري سائيڪلنگ جي مرڪز ۾ تبديل ٿيڻ گهرجي. وزارت پاران جاري بيان موجب اهڙو اظهار هن هانگ ڪانگ ڪنوينشن (ايڇ ڪي سي) جي تعميل بابت اعليٰ سطحي اجلاس جي صدارت ڪندي چئي. ايڇ ڪي سي سان شپ بريڪنگ انڊسٽريءَ کي هم آهنگ ڪرڻ لاءِ حڪومت جي عزم کي ورجايو. وفاقي وزير چيو آهي ته محفوظ ۽ ماحول دوست ري سائيڪلنگ جي طريقن ذريعي موسمياتي تبديلين کي مُنهن ڏيڻ جي ضرورت آهي. وفاقي وزير پورٽس اينڊ شپنگ انتظاميه کي هانگ ڪانگ ڪنوينشن جي تعميل تي پهريون گرين يارڊ سرٽيفڪيٽ هڪ هفتي اندر جاري ڪرڻ جي هدايت پڻ ڪئي. هن چيو ته تقريبن 135 نامزد پلاٽن سان 10 ڪلوميٽر سامونڊي پٽيءَ تي پکڙيل گڏاڻي هڪ وڏي تبديليءَ مان گذري رهيو آهي. ماحول دوست آپريشنز لاءِ 11 گز هاڻ مڪمل ٿيڻ جي ويجهو آهي، جڏهن ته وڌيڪ 20 جون 2026ع تائين گرين ري سائيڪلنگ شروع ڪرڻ لاءِ تيار آهن. هانگ ڪانگ ڪنوينشن جيڪو 26 جون 2025ع تي قانوني طور پابند ٿي وڃي ٿو، سمورين قومن کان جهاز جي ري سائڪلنگ جا محفوظ طريقا اختيار ڪرڻ جي گهر ڪري ٿو جيڪو خطرناڪ گدلاڻ کي گهٽ کان گهٽ ڪري ٿو ۽ ماحولياتي نقصان کي گهٽ ڪري ٿو. وفاقي وزير ان ڳالهه تي زور ڀريو ته مڪمل تعميل نه صرف هڪ قانوني ذميداري آهي پر ڪاربان جي اثرن کي گهٽ ڪرڻ، گدلاڻ کي روڪڻ ۽ سرڪلر اڪانومي جي طريقن کي هٿي ڏئي موسمياتي تبديلين سان وڙهڻ ۾ اسان جي ذميداريءَ جو حصو آهي. وفاقي وزير چيو ته سبز جهازن جي ري سائيڪلنگ، ماحولياتي تحفظ ۽ پائيدار اقتصادي ترقي ٻنهي لاءِ مرڪزي حيثيت رکي ٿو. هن گڏاڻي کي آبهوا جي لحاظ سان جهازن کي ختم ڪرڻ لاءِ هڪ عالمي ماڊل ۾ تبديل ڪرڻ لاءِ بلوچستان حڪومت سان ويجهي تعاون تي زور ڀريو. منتقلي جي قيادت ڪرڻ لاءِ ميري ٽائم وزارت جي فني صلاحڪار جواد اختر جي سربراهيءَ ۾ هڪ ملٽي اسٽيڪ هولڊر ڪميٽيءَ کي بنيادي ڍانچي جي کوٽ جو جائزو وٺڻ ۽ گڏاڻيءَ ۾ ماحول دوست ترقيءَ کي ترجيح ڏيڻ جو ڪم سونپيو ويو آهي. گڏاڻي شپ بريڪنگ يارڊ کي جديد سهولتن سان تيار ڪرڻ لاءِ 12 ارب رپين جو وفاقي منصوبو اڳ ئي منظور ڪيو ويو آهي جنهن ۾ هڪ خطرناڪ ويسٽ ٽريٽمينٽ پلانٽ، ون ونڊو سهولت سينٽر، ريسڪيو ۽ فائر سيفٽي سروسز، هڪ اسپتال، صاف پاڻيءَ جي فراهمي ۽ بهتر رسائي وارا روڊ شامل آهن. هي سڀ محفوظ ۽ پائيدار ري سائيڪلنگ آپريشنز کي سپورٽ ڪرڻ لاءِ ڊزائين ڪيا ويا آهن. وفاقي وزير ڪراچيءَ ۾ گرين پورٽس شپنگ ۽ مربوط ميري ٽائم انڊسٽريءَ لاءِ نيشنل سينٽر آف ايڪسيلينس جي قيام جون هدايتون ڏنيون ته جيئن گرين ميري ٽائم پريڪٽس ۾ تحقيق، تربيت، ڪاروبار ۾ آساني کي اڳتي وڌائي سگهجي. جديد دؤر جي گهرجن تحت سمورن سامونڊي جهازن کي 500 مجموعي ٽن وزن کان وڌيڪ ري سائيڪلنگ کان پهرين هڪ بين الاقوامي سرٽيفڪيٽ آن ان وينٽري آف هيز ڊوس ميٽريلز سان گڏ هئڻ گهرجي. ان ڳالهه کي يقيني بڻائيندي ته زهريلي مادن جو مناسب انتظام ڪيو ويو آهي. هي مينڊيٽ 2030ع تائين عالمي سطح تي مؤثر هئڻ سان توقع ڪئي وڃي ٿي ته روايتي طور شپ بريڪنگ سان واڳيل ماحولياتي خطرن ۾ نمايان گهٽتائي ايندي. جنيد انوار چوڌري چيو ته پاڪستان پنهنجي ماحول ۽ ڪارڪنن ٻنهي جي تحفظ لاءِ پُرعزم آهي. ذميداراڻي ري سائيڪلنگ ذريعي گڏاڻي آبهوا جي موافق طريقن ۾ هڪ رهنما طور اُڀري سگهي ٿو، جنهن سان پائيدار روزگار پيدا ڪندي عالمي سطح تي ڊيڪاربونائزيشن جي هدفن ۾ حصو وجهي سگهجي ٿو.
