اسلام آباد-29 آگسٽ (اي پي پي) قومي غذائي تحفظ ۽ تحقيق واري وفاقي وزير رانا تنوير حسين جي صدارت هيٺ سي آءِ ايم ايم واءِ ٽي جي پاڪستان ۾ ڪنٽري ريپريزنٽيٽو ڊاڪٽر ساجد علي سان هڪ اعليٰ سطحي اجلاس جي صدارت ڪئي. اجلاس ۾ پاڪستان ۽ سي آءِ ايم ايم واءِ ٽي وچ ۾ جاري حصيداري ۽ ڪڻڪ جي پيداوار وڌائڻ ۽ ملڪ ۾ غذا ۽ غذائيت جي تحفظ کي يقيني بڻائڻ لاءِ جديد حڪمت عملين جو جائزو ورتو ويو. وزارت موجب وفاقي وزير پاڪستان ۾ 1960ع جي ڏهاڪي دوران سبز انقلاب آڻڻ ۾ ڊاڪٽر نارمن بورلاگ ۽ پاڪستاني سائنسدانن جي تاريخي ڪردار کي خراجِ تحسين پيش ڪيو. هن چيو ته پاڪستان انهن پهرين ملڪن ۾ شامل هو جن سي آءِ ايم ايم واءِ ٽي ميڪسيڪو جي تيار ڪيل سيميڊارف ڪڻڪ جا قسم اختيار ڪيا جنهن سان غذائي کوٽ تي ضابطو آڻڻ ۽ پائيدار غذائي تحفظ جا بنياد رکڻ ۾ مدد ملي. پاڪستان ڊاڪٽر بورلاگ جي خدمتن جي اعتراف ۾ 1968ع ۾ کيس ستاره امتياز سان به نوازيو هو. ڊاڪٽر ساجد علي وفاقي وزير کي پاڪستان جي زرعي ترقيءَ ۾ سي آءِ ايم ايم واءِ ٽي جي ڊگهي مُدي جي ڪردار جي باري ۾ آگاهه ڪيو. هن ٻُڌايو ته صرف گذريل ڏهاڪن دوران پاڪستان ۾ تقريبن 70 قسم جا ڪڻڪ جا نمونا متعارف ڪرايا ويا، جن ۾ 90 سيڪڙو سي آءِ ايم ايم واءِ ٽي جي جديد جينوم تي ٻَڌل آهن. اڄ پاڪستان جي تقريبن 9 ملين هيڪٽر زمين تي پوکي ويندڙ 90 سيڪڙو ڪڻڪ 25 ڪروڙ آباديءَ کي غذا فراهم ڪري ٿي. سي آءِ ايم ايم واءِ ٽي جي جدت تي ٻڌل آهي. هي قسم وڌيڪ پيداوار، بيمارين خلاف مزاحمت، بهتر معياري جنس ۽ زنڪ ۽ آئرن جهڙن ضروري جُزن سان ڀرپور آهن. هن وفاقي وزير کي سي آءِ ايم ايم واءِ ٽي ڊي جي ڊاڪٽر برام گووارٽس جي پاڪستان جي دؤري بابت آگاهه ڪيو جيڪو 14 کان 16 سيپٽمبر تي متوقع آهي. پنهنجي دؤري دوران ڊاڪٽر گووارٽس وزارت، قومي ادارن ۽ عالمي حصيدارن سان ملاقاتون ڪندو. وفاقي وزير ان ڳالهه تي زور ڀريو ته ڪڻڪ جي پيداوار ۾ واڌ پاڪستان جي مجموعي زرعي ترقيءَ لاءِ اهم حيثيت رکي ٿو. ڇاڪاڻ ته ڪڻڪ ملڪ جو بنيادي فصل آهي ۽ خوراڪ جي نظام جي ڪرنگهي جي هڏي آهي. هن چيو ته جديد قسمن ۽ نئين پوکيءَ جي هنرن کي اختيار ڪرڻ سان نه صرف في ايڪڙ پيداوار وڌندي پر آبادگارن جي آمدنيءَ ۾ واڌ پڻ ٿيندي. آمدني واپار تي گهٽ ڀاڙڻو پوندو ۽ زرعي شعبو وڌيڪ پائيدار بڻجندو. وفاقي وزير پاڪستان ۾ سي آءِ ايم ايم واءِ ٽي جي سرگرمين لاءِ حڪومت جي ڀرپور حمايت کي ورجايو ۽ ان جي حصيداريءَ کي غذائي خودڪفالت ۽ عوام لاءِ بهتر غذائيت يقيني بڻائڻ لاءِ نهايت اهم قرار ڏنو.
