اسلام آباد-29 آگسٽ (اي پي پي) صنعتن ۽ پيداوار بابت وزيراعظم جي خاص مددگار هارون اختر چيني ڪمپني هواگوان جي چيف ايگزيڪيوٽو آفيسر سان ملاقات ڪئي. ملاقات ۾ اليڪٽرڪ گاڏين، ليٿيم بيٽريز، روبوٽڪس ۽ ڊرون ٽيڪنالاجي ۾ گڏيل تعاون جي موقعن تي خيالن جي ڏي وٺ ڪئي وئي. وزارت موجب وزيراعظم محمد شهباز شريف جي ويزن کي اجاگر ڪندي هارون اختر چيو ته اليڪٽرڪ گاڏيون ئي مستقبل آهن. هن چيو ته اليڪٽرڪ گاڏين کي اختيار ڪرڻ ماحول جي تحفظ ۽ ملڪ جي تيل جي درآمدي بل ۾ گهٽتائيءَ لاءِ اڻٽر آهي. ليٿيم بيٽريز جي اهميت تي ڳالهائيندي هن چيو ته ان ۾ توانائي ذخيرو ڪرڻ جي بي پناهه صلاحيت موجود آهي ۽ هي مستقبل جي توانائي منظرنامي ۾ اهم ڪردار ادا ڪندي. هواگوان جي سي اي او ٻُڌايو ته ان جي ڪمپني زرعي مقصدن لاءِ ليٿيم بيٽريز تي هلندڙ ڊرونز به تيار ڪري رهي آهي. هارون اختر ان موقعي تي چيو ته سڄي دنيا ۾ روبوٽڪس ۽ ڊرونز جو استعمال، صحت جي شعبي، زراعت ۽ روزاني زندگيءَ جي معمول ۾ تيزيءَ سان وڌي رهيو آهي. هن وڌيڪ چيو ته ڊرونز ٻوڏ ۽ قدرتي آفتن دوران ريسڪيو ۽ رليف آپريشنز ۾ مددگار ثابت ٿي سگهن ٿا. هارون اختر ان ڳالهه تي زور ڀريو ته وزيراعظم جو ايندڙ چين جو دؤرو ٻنهي ملڪن جي لاڳاپن کي وڌيڪ مضبوط ڪندو. هن چيو ته چين سان گڏيل منصوبا ۽ بزنس ٽو بزنس تعاون اقتصادي حصيداريءَ ۾ سنگ ميل ثابت ٿيندا. ملاقات جي پڄاڻيءَ ۾ هن چيو ته هي دؤرو سيڙپڪاري، بزنس ٽو بزنس تعاون ۽ نوان موقعا کوليندو جيڪو پاڪستان جي معاشي تريءَ ۾ به مددگار ثابت ٿيندو.
