راولپنڊي-29 آگسٽ (اي پي پي) آرمي چيف فيلڊ مارشل سيد عاصم منير پنجاب جي ٻوڏ سٽيل علائقن ۾ فوجي جوانن ۽ سول انتظاميه جي اڻٿڪ ڪوششن کي ساراهيو آهي. هن خاطري ڪرائي ته ٻوڏ دوران متاثر ٿيل سڀني مذهبي ماڳن درٻار ڪرتارپور سميت ٻين کي ترجيحي بنيادن تي اصل حالت ۾ بحال ڪيو ويندو. آءِ ايس پي آر پاران جاري بيان موجب فيلڊ مارشل سيد عاصم منير نشانِ امتياز (ملٽري)، هلال جرئت پنجاب جي ٻوڏ متاثر علائقن سيالڪوٽ، سيڪٽر، شڪر ڳڙهه، نارووال ۽ ڪرتارپور سميت ٻين علائقن جو دؤرو ڪيو. دؤري جو مقصد ٻوڏ جي صورتحال ۽ جاري ريسڪيو ۽ رليف جي سرگرمين جو جائزو وٺڻ هو. چيف آف آرمي اسٽاف کي موجوده صورتحال ۽ برساتن جي ايندڙ مرحلي لاءِ تيارين تي جامع بريفنگ ڏني وئي. آرمي چيف فوجي جوانن ۽ سول انتظاميه جي اڻٿڪ ڪوششن کي ساراهيو، جيڪي متاثر علائقن ۾ عوام جي جان بچائڻ ۽ امداد فراهم ڪرڻ ۾ مصروف آهن. آرمي چيف علائقي جي متاٿر ٿيل سک برادريءَ سان به ملاقات ڪئي ۽ کين خاطري ڪرائي ته ٻوڏ دوران متاثر ٿيندڙ ڪرتارپور درٻار سميت سڀني مذهبي ماڳن کي ترجيحي بنيادن تي اصل حالت ۾ بحال ڪيو ويندو. هن ان ڳالهه کي ورجايو ته اقليتن ۽ انهن جي مذهبي ماڳن جي تحفظ جي ذميداري رياست ۽ انهن جي ادارن جي آهي، پاڪستان جي رياست پنهنجي ان ذميداريءَ کي نڀائڻ ۾ ڪابه ڪسر نه ڇڏيندي. سک برادري سيالڪوٽ سيڪٽر جي ٻوڏ سٽيل علائقن ۾ آرمي چيف جي آمد تي شاندار آڌرڀاءُ ڪيو ۽ آفت دوران سول انتظاميه ۽ فوج طرفان فراهم ڪيل خدمتن تي ٿورو مڃيو. آرمي چيف درٻار صاحب ڪرتارپور جو فضائي معائنو ڪيو ۽ سول انتظاميه جي نمائندن سان ڳالهائيندي آرمي چيف وقت سر ردِعمل جي ساراهه ڪئي، جنهن سبب جاني ۽ مالي نقصان گهٽ ٿيو. جوانن سان ملاقات دوران آرمي چيف انهن جي بلند حوصلي، آپريشنل تياري ۽ قوم جي خدمت جي جذبي کي ساراهيو. هن مشڪل حالتن ۾ ريسڪيو ۽ رليف آپريشنز دوران عوام جي خدمت ڪرڻ تي فوجي جوانن جي خدمتن کي خراجِ تحسين پيش ڪيو. فيلڊ مارشل سيد عاصم منير جي آمد تي ڪور ڪمانڊر گوجرانوالا سندس آڌرڀاءُ ڪيو.
