اسلام آباد-29 آگسٽ (اي پي پي) سينيٽ چيئرمين سيد يوسف رضا گيلانيءَ سان قومي اسيمبليءَ جي اسپيڪر سردار اياز صادق ملاقات ڪئي، جنهن ۾ سينيٽ ۽ قومي اسيمبليءَ ۾ اداره جاتي تعاون وڌيڪ وڌائڻ تي اتفاق ٿيو. سينيٽ سيڪريٽريٽ موجب ملاقات ۾ 11 کان 12 نومبر تي بين الپارلياماني اسپيڪرز ڪانفرنس جي تيارين تي غور ويچار ڪيو ويو. سينيٽ چيئرمين بين الپارلياماني اسپيڪرز ڪانفرنس جي حوالي سان قومي اسيمبليءَ جي اسپيڪر کي تفصيلي آگاهه ڪيو. سينيٽ چيئرمين ٻُڌايو ته 45 کان وڌيڪ ملڪن جي نمائندن جي ڪانفرنس ۾ شرڪت جو امڪان آهي. خطي ۾ امن، ترقي ۽ موسمياتي چئلينجز سميت ٻين عالمي مسئلن تي ڳالهه ٻولهه ٿيندي. اسپيڪر چيو ته پاڪستان جي لاءِ ڪانفرنس اهم موقعو آهي، قومي اسيمبلي ڀرپور تعاون ڪندي. ملاقات دوران ملڪ جي موجوده سياسي ۽ معاشي صورتحال، ڀارت طرفان درياهن ۾ ڇڏيل پاڻي ۽ ٻوڏ جي تباهڪارين تي ڳالهه ٻولهه ٿي. ٻنهي اڳواڻن عوام کي اپيل ڪئي ته احتياطي تدبيرون اختيار ڪن ۽ حڪومت سان تعاون ڪن. اسپيڪر، سيد تنوير الحسن گيلاني جي لاڏاڻي تي تعزيت جو اظهار ڪيو ۽ چيو ته مرحوم هڪ نيڪ سيرت انسان هو، سينيٽ چيئرمين ۽ مرحوم جي وارثن جي ڏُک ۾ برابر جو شريڪ آهيان. سردار اياز صادق، سينيٽ چيئرمين سان تعزيت ڪئي ۽ مرحوم جي بخشش لاءِ دُعا ڪئي.
