اسلام آباد-28 آگسٽ (اي پي پي) ڪشمير، گلگت بلتستان ۽ سيفران واري وفاقي وزير انجنيئر امير مقام هاڻوڪن ڏينهن ۾ گليشيئر ڦاٽڻ سبب شديد تباهيءَ جو شڪار غذر ضلعي جي متاثر علائقي تالي داس جو دؤرو ڪيو، گوپس واري هنڌ تالي داس ۾ گليشيئر ڦاٽڻ سان پاڻي ڍنڍ جي شڪل اختيار ڪري ورتي آهي. وزارت موجب وفاقي وزير متاثرن لاءِ قائم ڪيمپ جو دؤرو ڪيو، متاثر خاندانن سان ملاقات ڪئي ۽ ساڻن همدرديءَ جو اظهار ڪندي چيو ته وفاقي حڪومت ساڻن گڏ آهي. هن متاثرن کي خطاب ڪندي چيو ته زميني رابطو بحال ڪرڻ لاءِ فوري قدمن جي هدايت ڪئي وئي آهي. وفاقي وزير پاڪستان ٽيلي ڪميونيڪيشن اٿارٽي کي ٻوڏ متاثر علائقن ۾ موبائل نيٽ ورڪ بحال ڪرڻ جي هدايت پڻ ڪئي. هن چيو ته وزيراعظم محمد شهباز شريف جي واضح هدايت آهي ته متاثر ماڻهن تائين پهچڻ ۽ علائقي ۾ معمول جي زندگي بحال ڪرڻ لاءِ ڪابه ڪسر نه ڇڏي ويندي، وفاقي حڪومت ان مشڪل وقت ۾ گلگت بلتستان جي عوام سان گڏ آهي. وفاقي وزير چيو ته ٻوڏ سبب ٿيل تباهين جي نتيجي ۾ جيڪي ماڻهو جانيون وڃائي ويٺا آهن انهن جي وارثن کي 20-20 لک رپين جي مالي امداد جا چيڪس پيش ڪيا ويا. متاثر ڪٽنبن لاءِ دُعا ڪريون ٿا، خاطري ڪرايون ٿا ته حڪومت انهن سان هر ممڪن تعاون جاري رکندي.
