اسلام آباد-28 آگسٽ (اي پي پي) سامونڊي معاملن واري وفاقي وزير محمد جنيد انوار چوڌري چيو آهي ته نوان ٽينڪرز پي اين ايس سي جي ٻيڙي کي 12 جهازن تائين وڌائن ٿا جيڪي قومي جهازراني جي شعبي کي مضبوط بنائڻ لاءِ حڪومتي جي عزم کي ورجائين ٿا. هن سال جي آخر تائين سامونڊي ٻيڙي جو انگ 20 تائين وڌائڻ جي عزم جو اعلان ڪيو. وزارت طرفان جاري بيان موجب پي اين ايس سي جي چيف ايگزيڪيوٽو آفيسر ضرار حسين وفاقي وزير کي ميٽنگ ۾ بريفنگ ڏني ته پاڪستان نيشنل شپنگ ڪارپوريشن ملڪ جي قومي جهنڊي بردار پنهنجي ٻيڙي کي 10 کان 12 جهازن تائين وڌائي ڇڏيو آهي، جنهن ۾ 2 ايفراميڪس ڪلاس ٽينڪرز، سوان ليڪ ۽ پي عليڪي شامل آهن، جنهن سان سامونڊي ۽ توانائيءَ جي چُرپر جي صلاحيت ۾ واڌ ٿيندي. وفاقي وزير ڪچي تيل ۽ پيٽروليم شين جي اچ وڃ ۾ پي اين ايس سي جي اهم ڪردار تي زور ڀريو. نوٽ ڪيو ته ايفراميڪس ٽينڪر، 80 هزار کان هڪ لک 20 هزار ڊيڊويٽ ٽن تائين وڏا ويري لارج ڪروڊ ڪيريئرز لاءِ ناقابل رسائي بندرگاهن تائين رسائي جي صلاحيت لاءِ عالمي سطح تي پسند ڪيا وڃن ٿا. اميد آهي ته ان جي واڌ سان توانائيءَ جي وڌندڙ آمدني واپار کي مؤثر طريقي سان سنڀالڻ لاءِ پاڪستان جي صلاحيت ۾ واڌ ٿيندي. وفاقي وزير ان ڳالهه تي زور ڀريو ته قومي ٻيڙي کي وڌائڻ سان غير ملڪي شپنگ لائنن تي گهٽ ڀاڙڻو پوندو، في الحال پرڏيهي ڪيريئرز کي مال برداري جي ادائگين تي پاڪستان کي ساليانو 4.6 بلين ڊالرن جي لاڳت اچي ٿي. هن وڌيڪ چيو ته پنهنجي جهازن تي وڌيڪ ڪارگو کڻي پي اين ايس سي جو مقصد مٽاسٽا جي ناڻي جي ذخيرن جي بچت، محصول ۾ واڌ ۽ توانائيءَ جي حفاظت ڪرڻ آهي. ميٽنگ ۾ وزارت جي سيڪريٽري سيد ظفر علي شاهه، ٻين عملدارن ڪراچي پورٽ ٽرسٽ اينڊ پورٽ قاسم اٿارٽي جي سربراهن شرڪت ڪئي.
