اسلام آباد – 28 آگسٽ (اي پي پي) ترڪيه جي صدر رجب طيب اردوان وزيراعظم محمد شهباز شريف سان ٽيليفون تي رابطو ڪري پاڪستان جي مختلف حصن ۾ ٻوڏ سبب قيمتي جانين ۽ ملڪيتن جي نقصان تي پاڪستان جي عوام سان يڪجهتي جو اظهار ڪندي هر ممڪن مدد جي آڇ ڪئي آهي. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف سان جمهوريه ترڪيه جي صدر رجب طيب اردوان ٽيليفون تي رابطو ڪيو. ترڪ صدر چيو ته ترڪيه امدادي ڪاررواين جي حوالي سان هر ممڪن مدد جي لاءِ تيار آهي. وزيراعظم هن مشڪل وقت ۾ ترڪ صدر جي جذبن ۽ ان پاران مدد جي فراخدلاڻي آڇ جا ٿورا مڃيندي چيو ته ترڪيه جي صدر پاران رابطو پاڪستان ۽ ترڪيه جي وچ ۾ مضبوط، گهري ۽ ڀائراڻي لاڳاپن جو عڪاس آهي، ٻئي ملڪ سدائين هڪ ٻئي سان گڏ بيٺل رهيا آهن. بيان موجب ٻنهي اڳواڻن هن سال جي شروع ۾ ٿيندڙ پنهنجي ڳالهه ٻولهه جي ڏس ۾ پڻ خيالن جي ڏي وٺ ڪئي. ان کانسواءِ چين جي شهر تيانجن ۾ شنگهائي تعاون تنظيم جي سربراهي اجلاس دوران پنهنجي ايندڙ ملاقات تي پڻ ڳالهه ٻولهه ڪئي.
