اسلام آباد – 28 آگسٽ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار لاڳاپيل عملدارن کي هدايت ڪئي آهي ته اهي ضرورت جي شين جي آسان پهچ کي يقيني بڻائين ۽ بنيادي شين جي بنا رڪاوٽ دستيابي سان انهن کي عام ماڻهن جي پهچ ۾ رکن. نائب وزيراعظم جي آفيس پاران جاري بيان موجب اها هدايت نائب وزيراعظم ۽ پرڏيهي وزير پنهنجي صدارت ۾ سڄي ملڪ ۾ ضرورت جي شين جي دستيابي ۽ اگهن جي حوالي سان هڪ اهم جائزه اجلاس دوران ڏني. اجلاس ۾ خوراڪ ۽ اقتصادي معاملن وارن وفاقي وزيرن، وزيراعظم جي خاص معاون طارق باجوه، خوراڪ، واپار ۽ صنعت وارن وفاقي سيڪريٽرين کانسواءِ صوبائي ادارن جي سينيئر نمائندن شرڪت ڪئي. نائب وزيراعظم ۽ پرڏيهي وزير عملدارن کي هدايت ڪئي آهي ته اهي ضرورت جي شين جي آسان پهچ کي يقيني بڻائين ۽ بنيادي خوراڪ جي شين جي بنا رڪاوٽ دستيابي کي عام ماڻهو جي پهچ ۾ رکن. هن وفاقي ۽ صوبائي حڪومتن جي وچ ۾ مضبوط هم آهنگي، بهتر مارڪيٽ نگراني، ذخيره اندوزي ۽ اجاره داري جي خلاف سخت ڪارروائي جي پڻ هدايت ڪئي. هن چيو ته حڪومت صارفين ۽ آبادگارن ٻنهي جي مفادن جي تحفظ جي لاءِ پرعزم آهي.
