وزير آباد – 28 آگسٽ (اي پي پي) اطلاعات ۽ نشريات واري وفاقي وزير عطاءُ الله تارڙ چيو آهي ته پوري خطي ۾ معمول کان وڌيڪ برساتون ٿيون آهن، هاڻي وقت اچي ويو آهي ته پاڻي جا ذخيرا، ڊيم ۽ نيڪاسي جا نالا ٺاهيا وڃن، ان تي ڪم جاري آهي ۽ هنگامي صورتحال ختم ٿيندي ئي قومي سطح تي اهم فيصلا ڪيا ويندا، چناب درياءَ ۾ چاڙهه جي ڪري وزير آباد کي خطرو هو، بهترين ڪوآرڊينيشن جي ڪري وڏي نقصان کان محفوظ رهياسين، ٽي کان چار موسمياتي نظام گڏ آيا، وڌيڪ برساتن جي اڳڪٿي آهي جنهن جي لاءِ اسان جي ڀرپور تياري آهي، پاڻي گذرگاهن جي ويجهو اڏاوتن کي روڪڻو پوندو. ڊي سي آفيس ۾ صحافين کي ٻوڏ جي صورتحال جي حوالي سان بريفنگ ڏيندي اطلاعات واري وفاقي وزير چيو ته گوجرانوالا ۾ چناب درياءَ ۾ چاڙهه جي ڪري وزير آباد کي خطرو هو، پاڻي جو وهڪرو 10 کان 12 لک ڪيوسڪ جي وچ ۾ رهيو جڏهن ته ماضي ۾ 6 لک ڪيوسڪ کان وڌيڪ پاڻي کي اونچي درجي جي ٻوڏ تصور ڪيو ويندو هو. هن چيو ته بهترين ڪوآرڊينيشن جي ڪري ڪو جاني نقصان ناهي ٿيو. وفاقي وزير چيو ته نيشنل ڊيزاسٽر مئنيجمينٽ اٿارٽي (اين ڊي ايم اي) وقت سر الرٽ جاري ڪيو، پي ڊي ايم اي، ريسڪيو 1122 ۽ ضلعي انتظاميا موثر ۽ تيز ريسپانس ڏنو جڏهن ته پاڪ فوج جون ڪوششون پڻ هر جڳهه تي نمايان رهيون. متاثر علائقن ۾ فوري انخلا، ريليف ۽ بحالي جا قدم کنيا ويا. هن چيو ته اهو قومي ريسپانس آهي، اهڙا مثالي ڪوآرڊينيشن گهٽ ئي ڏسڻ ۾ ملندا، جيئن ئي ٻوڏ جو ريلو آيو، انتظاميا به تيار هئي ۽ متاثر علائقن مان ماڻهن جي انخلا کي ممڪن بڻايو ويو. هن چيو ته رابطا رستن جي بحالي جي حوالي سان سروي اڄ شام تائين مڪمل ٿي ويندي، وزيراعظم اين ايڇ اي کي صوبائي رستن جي بحالي جي لاءِ تعاون جي هدايت ڪئي آهي. هن چيو ته توانائي وارو وفاقي وزير اويس لغاري پڻ گوجرانوالا اچي رهيو آهي، بجلي جي ڪجهه فيڊرز کي عوام جي تحفظ جي ڏس ۾ بند ڪيو ويو هو ته جيئن ڪرنٽ جوخطرو نه ٿئي، اهي به بحال ڪيا ويندا. هن چيو ته کاڌي پيتي جي شين، تنبوئن ۽ دوائن جي حوالي سان سمورا انتظام موجود آهن، پاڪ فوج امدادي ڪاررواين ۾ شريڪ آهي جڏهن ته چوپائي مال جي نقصانن جو ڪاٿو لڳايو پيو وڃي، نقصانن جو ازالو پڻ ڪيو ويندو. هن چيو ته ماڻهن جي مشڪلاتن جو احساس آهي، جن ماڻهن کي لڏپلاڻ ڪرڻي پئي اسان جون همدرديون انهن سان گڏ آهن، پوري انتظاميا ان ڪوشش ۾ آهي ته انهن جي گهرن کي بحال ڪيو وڃي. وفاقي وزير چيو ته ايندڙ ڪجهه هفتن ۾ وڌيڪ برساتن جي اڳڪٿي آهي، جيستائين اهو سلسلو ختم نٿو ٿي وڃي چاڙهه جو خطرو موجود رهندو، شهري احتياط ڪن، شهرين کي مليريا ۽ پاڻي سان ڦهلجندڙ بيمارين جي حوالي سان مڪمل آگاهي ڏني پئي وڃي ۽ انتظاميا به ان حوالي سان متحرڪ آهي. هن چيو ته سوهدره روڊ تي پاڻي آهستي آهستي واپس وڃي رهيو آهي، هن وقت پاڻي جو وهڪرو خانڪي ۾ ساڍا 5 لک ڪيوسڪ ۽ قادر آباد ۾ 6 لک 60 هزار ڪيوسڪ آهي. وزير آباد جي علائقي خانڪي ۽ قادر آباد سان گڏ ڳوٺ الحمدالله محفوظ آهن، اسان وڏي نقصان کان بچي ويا آهيون، وقت سر ۽ اڳواٽ اطلاع جي ڪري اهو ممڪن ٿي سگهيو. هن چيو ته پنجاب حڪومت ڪنهن به هنگامي صورتحال کي منهن ڏيڻ جي لاءِ مڪمل طور تي تيار هئي، سمورا ادارا ٽيم ورڪ جي طور تي ڪم ڪري رهيا آهن جڏهن ته ميڊيا جو به ان ۾ اهم ڪردار آهي. وفاقي وزير چيو ته ضلعي انتظاميا متاثرين کي هر ممڪن مدد فراهم ڪري رهي آهي، اڳتي به ڪوشش هوندي ته اهڙي طرح ٽيم ورڪ سان ريليف ۽ ريسڪيو سرگرميون جاري رهن. هن چيو ته جن علائقن تان خطرو ٽري ويو آهي اتي متاثر عوام کي ٻيهر آباد ڪيو ويندو. هن چيو ته ضلعي انتظاميا پاران بهترين انتظامن کي ساراهڻ گهرجي. سمورن ادارن ڀرپور ڪردار ادا ڪيو جنهن جي نتيجي ۾ وڏي نقصان کان بچاءُ ممڪن ٿيو ۽ اهو تعاون اڳتي به جاري رهندو. هن چيو ته جڏهن به ڪا آفت اچي ٿي ته پوري پاڪستاني قوم متحد ٿي وڃي ٿي، خيبرپختونخواهه وانگر هتي به اسان گڏجي صورتحال کي بهتر بڻائينداسين، عوام به مشڪل وقت ۾ انتظاميا سان تعاون ڪيو، ايندڙ ڪجهه ڏينهن ۾ صورتحال ۾ وڌيڪ بهتري ايندي. هڪ سوال جي جواب ۾ هن چيو ته خطي ۾ برساتون معمول کان وڌيڪ ٿيون، پهريون ڀيرو ائين ٿيو آهي جو ٽي چار برساتي نظام گڏ آيا، وڌيڪ برساتن جي اڳڪٿي آهي جنهن جي لاءِ اسان جي ڀرپور تياري آهي. وفاقي وزير چيو ته پاڻي گذرگاهن جي ويجهو اڏاوتن کي روڪڻو پوندو. هن چيو ته فوت ٿيندڙن جي پونئيرن جي لاءِ في ڪس 20 لک رپيا معاوضو رکيو ويو آهي. هن چيو ته گم ٿيل ماڻهن جي ڳولا جاري آهي. وفاقي وزير چيو ته هاڻي وقت اچي ويو آهي ته پاڻي جا ذخيرا، ڊيم ۽ نيڪاسي جا نالا ٺاهيا وڃن، ان تي ڪم جاري آهي ۽ جيئن ئي هنگامي صورتحال ختم ٿيندي، قومي سطح تي اهم فيصلا ڪيا ويندا.
