اسلام آباد -28 آگسٽ (اي پي پي) وزيراعظم محمد شهباز شريف پنجاب جي ٻوڏ متاثر علائقن جي دوري تي روانو ٿي ويو آهي. وزيراعظم آفيس جي ميڊيا ونگ پاران جاري ڪيل بيان موجب روانگي کان اڳ ۽ فضائي جائزي دوران اين ڊي ايم اي جي چيئرمين ليفٽيننٽ جنرل انعام حيدر وزيراعظم کي ملڪ ۾ ٻوڏ جي مجموعي صورتحال تي تفصيلي بريفنگ ڏني. وزيراعظم کي پنجاب جي دريائن ۾ ٻوڏ ۽ پاڻي هيٺ آيل علائقن ۾ ريسڪيو ۽ امدادي آپريشن بابت تفصيلي بريفنگ ڏني وئي. پنجاب جي وزيراعليٰ مريم نواز شريف به وزيراعظم سان گڏ لاهور کان نارووال لاءِ روانو ٿي ۽ اُڏام دوران ساڻس ٻوڏ جي صورتحال تي خيالن جي ڏي وٺ ڪئي. اين ڊي ايم اي چيئرمين ٻوڏ جي صورتحال ۽ حڪومت پاران کنيل قدمن بابت آگاهه ڪيو. بيان موجب وزيراعظم محمد شهباز شريف ٻوڏ متاثر علائقن جو فضائي جائزو وٺندي ٻوڏ جي صورتحال کان بچاءُ ۽ امدادي ڪاررواين لاءِ سمورا ضروري قدم کڻڻ جون هدايتون جاري ڪيون. وزيراعظم ۽ وزيراعليٰ کي نارووال ۾ تفصيلي بريفنگ ڏني ويندي.
