اسلام آباد- 28 آگسٽ (اي پي پي) خاتون اول آصفه ڀٽو زرداري گڏيل عرب امارات جي عورتن جي قومي ڏينهن جي موقعي تي زندگي جي مختلف شعبن ۾ قائداڻو ڪردار ادا ڪندڙ اماراتي عورتن جي عزم کي سلام پيش ڪيو آهي. ايڪس تي پنهنجي پوسٽ ۾ خاتون اول آصفه ڀٽو زرداري چيو ته اماراتي عورتن جي ڏينهن تي آئون اماراتي عورتن جي حوصلي کي سلام پيش ڪريان ٿي جيڪي رڪاوٽن کي عبور ڪري حڪومت، ڪاروبار، سائنس ۽ ثقافت جي شعبن ۾ قيادت جي عهدن تي فائز ٿيون. هن چيو ته اهو سڀ ڪجهه مادر ملت شيخه فاطمه بنت مبارڪ جي ويزن جي رهنمائي تحت ممڪن ٿيو آهي. آصفه ڀٽو زرداري چيو ته اهي نه رڳو گڏيل عرب امارات جي ترقي جو مرڪزي ٿنڀ آهن پر پوري دنيا جي لاءِ هڪ مثال پڻ آهن. واضح رهي ته اهو ڏينهن هر سال 28 آگسٽ تي ملهايو وڃي ٿو، هن سال اماراتي عورتن جي ڏينهن جو مرڪزي خيال ”هٿن ۾ هٿ، اسان ملهائي رهيا آهيون ڪامياب جا 50 سال“ رکيو ويو آهي.
