اسلام آباد – 27 آگسٽ (اي پي پي) وزيراعظم محمد شهباز شريف پاڪستان سان ايشيائي ترقياتي بئنڪ جي پراڻي حصيداري کي ساراهيندي چيو آهي ته ايشيائي ترقياتي بئنڪ (اي ڊي بي) پاڪستان جي ترقي ۽ خوشحالي جي سفر ۾ سدائين اعتماد جوڳي حصيدار رهي آهي، اي ڊي بي جي پاڪستان جي ڪيترن ئي وڏن ترقياتي منصوبن ۾ حصيداري جي لاءِ دلچسپي ملڪي معيشت جي لاءِ انقلابي ثابت ٿيندي. اهڙن خيالن جو اظهار هن ايشيائي ترقياتي بئنڪ جي صدر مساتو ڪانڊا جي سربراهي ۾ وفد سان ڳالهائيندي ڪيو جنهن ساڻس ملاقات ڪئي. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف ايشيائي ترقياتي بئنڪ جي صدر جي پاڪستان اچڻ تي آجيان ڪئي. هن چيو ته ريلوي، پبلڪ ٽرانسپورٽ ۽ معدنيات جي شعبن ۾ پاڪستان ۽ اي ڊي بي حصيداري وڌائي سگهن ٿا جيڪا ملڪي معيشت جي لاءِ انتهائي ڪارائتي هوندي. وزيراعظم اي ڊي بي جي وفد کي پاڪستان حڪومت پاران متعارف ڪرايل سڌارن بابت آگاهه ڪيو جن ۾ ٽيڪس اوڳاڙين ۾ اضافو، توانائي جي شعبي ۾ سڌارا، مالي استحڪام کي بهتر بڻائڻ، موسمياتي تبديلي جي تباهي آڻيندڙ اثرن جي خلاف قدم، غير هدف ٿيل سبسڊي ۾ گهٽتائي ۽ سماجي تحفظ کي وڌائڻ شامل آهي. ايشيائي ترقياتي بئنڪ جي صدر ايشيائي ترقياتي بئنڪ سان پاڪستان جي هڪ باني ميمبر جي حيثيت سان ڊگهي وابستگي ۽ پاڪستان حڪومت جي جامع سڌارن کي ساراهيو ۽ پاڪستان جي لاءِ بئنڪ جي مسلسل حمايت جي عزم جو ورجاءُ ڪيو. هن پاڪستان ۾ انفراسٽرڪچر جي ترقي، ماحولياتي تبديلي جي شعبي ۽ اداراجاتي سڌارن ۾ تعاون وڌائڻ جي لاءِ بئنڪ جي عزم جي تجديد ڪئي. ملاقات جي موقعي تي اقتصادي معاملن وارو وفاقي وزير احد خان چيما، ناڻي ۽ اوڳاڙين وارو وفاقي وزير محمد اورنگزيب، پاور ڊويزن وارو وفاقي وزير سردار اويس احمد خان لغاري، ريلوي وارو وفاقي وزير حنيف عباسي، ناڻي ۽ ريلوي وارو مملڪتي وزير بلال اظهر ڪياني ۽ لاڳاپيل اعليٰ سرڪاري آفيسر پڻ موجود هئا.
